WILLEMSTAD (PAIS) -- Despues di un restrukturashon di e gabinete tin e.o un minister nobo di ekonomia.
Promé ku èks minister Stanley Palm (PAIS) a baha tantu Banko Sentral komo otro institutonan rekonosé a indiká ku tin kresementu leve den nos ekonomia. Alex Rosaria, lider di partido PAIS no por kaba di komprondé ku den Staten por tin hende, ku mester ta sano na mente, ta pensa ku por dal un hende ku pipa kibra su dos pianan anto despues eksigí ku e por kore 100m duru tambe. Simplemente e no ta posibel.
Ekonomia no por krese mas ku e ta kresiendo pasobra a masakrá e pueblo i ekonomia dor di mal maneho, malgastamentu di plaka ku a kondusí na instrukshon (aanwijizing) di Ulanda riba gobièrnu di Kòrsou na 2012. Alex Rosaria a bisa ku mientrastantu tin parlamentarionan mentiroso e lo sigui splika e bèrdat, pasobra si no tabatin e loke el a yama ‘voodoo finance’ anto dushi Kòrsou i su ekonomia lo no tabata den e situashon ku e tabata, pero ku danki Dios e ta rekuperando for di dje.
E lider di partido PAIS a puntra e minister nobo di ekonomia, ku si a sigui ku e maneho ku tabatin na 2010 i no tabatin kambio na 2012, kuantu e dekresementu ekonómiko lo tabata awor aki? For di 2010 te awor aki kuantu kupo di trabou èkstra a keda kreá, kuantu empresa a sera i kuantu empresa a habri nan porta kada aña? Rosaria ke sa kon e grado di konfiansa ta segun investigashon di büró di statistik (CBS).
Den reunion di Staten, tratando presupuesto, Rosaria a puntra si e minister nobo ta pará tras di e rapòrt TAC. Básikamente e rapòrt aki ta menshoná dos punto ku mester kambia den e struktura ekonómiko di e pais aki pa ekonomia krese. e rapòrt ei a bisa ku mester bin un lei di kompetensia, loke eks minister Palm (PAIS) a prepará i ta na staten pa aprobashon. Tambe TAC ta bisa ku mester bin kambionan fundamental den e merkado laboral.
Tin hende ta kere ku ekonomia ta krese pa medio di un òf mas proyekto i p’esei el a puntra e minister di ekonomia nobo si e ta kere ku ekonomia ta krese a base di proyekto. Na opinion di Rosaria, no ta proyekto ta e kos. Den e pais aki tabatin muchu tiki kurashi pa atendé ku asuntunan na un manera struktural. E paisnan ku ta eksitoso den nan ekonomia ta pasobra nan a kambia nan struktura ekonómiko. Segun e lider di partido PAIS, ekonomia ta kresiendo pero mester laga e pianan dje koredó kura despues di e leshonnan serio ku a kous’é.