ORANJESTAD -- Den oranan di diaranzon atardi a tuma lugar apertura di e cancha di bala di yerba articifial na Bushiri.
Un cancha masha bunita unda e hobennan por hunga na nan antoho. Pa e cancha keda mantene bunita manera cu e ta y pa controla e weganan di bala, e bario a forma un comision cu ta bay regula tur esaki. Prome cu e apertura oficial Director di FCCA Peter van Poppel a gradici tur presente, BoBario y tur otro cu a hinca nan energia den e proyecto fantastico aki. “Minister-President Mike Eman a aserca mi cu e peticion si FCCA por duna un man pa construi canchanan di yerba artificial den barionan. E prome resultado ta aki nan pa boso tur admira. Esaki ta e prome di 4 cancha cu nos a programa pa traha den barionan rond Aruba. Tin un ta biniendo cla na Madiki, un na Cura Cabay y Montserat (Noord).”
Despues di van Poppel a papia sra. Maruschka Rafini, hefe di seccion di vivienda di FCCA. E tabata contento cu e cancha ta cla y cu e muchanan tin un lugar pa distrai nan mes. “Boso cuid’e y mantene, pasobra ta pa boso haci uzo di dje e ta.” Minister Sevinger a yama danki na contratista Franklin Bareño, kende a construi e cancha. “Un bon trabou. Orguyoso di loke nos ta mira aki.” Minister President Mike Eman a gradici esnan cu a duna un man y na su departamento BoBario cu a hinca hopi esfuerso den e tremendo proyecto aki. “Mi tin e honor di anuncia cu e cancha aki ta haya nomber di Mario ‘Mai’ Maduro. Un persona cu semper den su oranan liber tey pa duna un man na hobennan pa loke ta deporte di futbol.” Mai Maduro a ricibi un bunita plakaat di man di Prome Minister Eman. “Siguientemente nos ta bay instala luz pa e bario aki. Algo cu ta masha necesario y ta un peticion di e bario. Pronto nan ta wordo instala”, Eman a bisa.
Un noticia cu a haya aplauso grandi. A sigui cu apertura di e cancha cu a wordo haci door di Eman y Sevinger, sigui pa un wega di bala entre empleadonan di FCCA y di gobierno. Despues di algun minuut di wega Eldrick Boekhoudt di BoBario a hinca goal y asina gobierno a gana e wega. Pabien na habitantenan di Bushiti cu un bunita cancha di bala.