WILLEMSTAD -- Dia 15 di yanüari Robert Connell di University of California at Berkeley lo presentá un charla na NAAM, titulá: "Maroon Societies and their Legacies: Ethnic Multiplicity in the African Diaspora"
Connell ta kandidato pa PhD den e departamentu di African American Studies and African Diaspora Studies i a studia komunidatnan “maroon/ shimaron” den nos region. Ora katibunan logra hui for di e sivilisashon kolonial opresor i lanta nan mes sivilisashon, tabata yama nan katibu shimaron.
E charla aki ta e promé aktividat públiko di e Dékada di Afrodesendiente deklará pa Nashonnan Uní. Desèmber 2015 a lansa un koalishon bou di guia di NAAM ku lo traha den kuadro di e dékada aki. E koalishon aki lo promové konosementu tokante e dékada i promové programa pa akshon. E tres áreanan ku Nashonnan Uní ta pidi pa enfatisá durante e dies añanan aki: rekonosementu, hustisia i desaroyo pa afrodesendientenan.
Kòrsou mester desaroyá maneranan pa edifiká un nashon fuerte konsistiendo di diferente grupo i etnisidat. Por siña di sosiedatnan ku a konosé e fenómeno di katibunan shimaron. Por ehèmpel na Sürnam, gobièrnu kolonial Hulandes a hañ’é obligá ta sera tratado di pas ku gruponan shimaron den selva, pa frena nan atakenan kontra plantashonnan. Asina a kuminsá edifiká un nashon ku por a biba na pas ku otro. Kòrsou mes no a konosé sosiedat shimaron riba nos mes suela; katibunan shimaron di Kòrsou a bai lanta nan bibá na entre otro Coro Venezuela.
Na nòmber di e koalishon di Dékada di Afrodesendiente NAAM ta invitá tur interesá na e charla aki tokante sosiedatnan shimaron pa partisipá i yuda edifiká nos nashon.
Logá : NAAM : Johan van Walbeeckplein 13
Fecha : Djabièrnè, 15 di yanüari
Ora : 7-9PM
E charla lo ta na ingles. Entrada ta grátis.