WILLEMSTAD (PAIS) -- Lider polítiko di Partido PAIS, Alex Rosaria, ke pa pronto ta posibel pa biaha entre di tur nos islanan hasiendo uzo di nos sédula.
Den e kuadro aki e Parlamentario a manda pidi komo Presidente di e komishon fiho di Staten di Hustisia pa tantu minister Navarro di Hustisia komo minister van der Horst mas pronto posibel bin den e komishon pa asina inventarisá tur e ‘bottlenecks’ ku te ainda ta stroba biahamentu ku sédula i traha un skema kon ta bai atendé ku kada un di nan.
Durante di e resien reunion Tripartit di Parlamentonan na Sint Maarten di paisnan Aruba, Kòrsou i Sint Maarten ku a tuma lugá riba 4 di yanüari 2016, a bolbe bin dilanti e deseo konhunto pa por biaha ku sédula. Rosaria ta di opinion ku en bista ku e proyekto di e ‘Fast Ferry’ entre di e islanan ABC ta den un fase hopi avansá i lo bai hasi mas fásil pa transporte di hende i karga entre di e islanan, ta masha importante ku nos ta hasi lihé ku e proseso ku mester kana pa fasilitá interkambio entre di nos islanan hasiendo uzo di nos sédula. Pa esaki ta posibel tur e sédulanan di e islanan mester ta kontené sierto datonan standarisá i mester kumpli entre otro ku sierto rekisitonan tékniko i di seguridat.