WILLEMSTAD -- Banda di e echo ku e parlamento aktual tin diferente miembro ku ta sospechoso, òf asta a keda kondená pa Korte di Hustisia, tin un kantidat di parlamentario ku no ta traha pa e salario ku Pueblo ta paga nan.
Segun Lider Polítiko di Partido Pro Kòrsou, Ivar Asjes, ta sumamente bergonsoso ku e reunion di parlamento di riba e konseshon nobo di haf djabièrnè ultimo no por a tuma lugá pa falta di kuorum. “No obstante ku ta konosí ku mester hasi invershonnan kuantioso pa kumpra krannan nobo i hasi mantenshon rigoroso na otro fasilidatnan den nos haf prinsipal mas ku 10 parlamentario no a bin reunion”. Partido Pro Kòrsou ta lamentá ku e parlamentarionan aki ta sigui pèrhudiká ekonomia di Kòrsou i ta preferá griteria ku pleitu na lugá di hasi nan trabou pa asina porfin por kaba modernisá e fasilidatnan den haf di Schottegat i habri kaminda pa desaroyo den otro hafnan. “Pro Kòrsou ke ta bon klá, esta ku no mester paga parlamentarionan ku no ta presentá na reunion pa hasi nan trabou”, asina Asjes a indiká.