WILLEMSTAD -- Djaweps 18 di febrüari, Minister di Tráfiko, Transporte i Planifikashon Urbano, sra. Suzy Camelia-Römer a regresá di su biahe kortiku pero fruktífero pa Londres, kaminda ela bishitá “International Maritime Organization” (IMO), un organisashon spesialisá di Nashonnan Uní.
Minister Camelia-Römer i su delegashon a logra nan meta pa IMO duna asistensia na Kòrsou pa modernisá nos sektor marítimo. Apesar di nan skema sumamente yen, a palabrá ku promé ku yüli di 2016, IMO lo bin Kòrsou pa hasi un asina yamá "Needs Assessment" di maneho, leinan i struktura gubernamental riba terenonan marítimo di nos país.
Na Londres, Minister Camelia-Römer a keda risibí dor di Embahador Hulandes i Representante Permanente di Reino Hulandes na IMO, sr. Simon Smits, i huntu nan a reuní ku e Sekretario General nobo di IMO, sr. Kitack Lim. Sr. Lim, kende a asumí su enkargo na IMO riba 1 di yanüari 2016, tin un plan ambisioso pa fortifiká sektor marítimo internashonal, pa hasi esaki duradero i garantisá ku tur pais ta inkluí den e desaroyo aki. Esaki ta kuadra kompletamente ku e vishon di Minister Camelia-Römer pa Kòrsou. Tambe a reuní ku Divishon di Koperashon Tékniko, bou di mando di sr. Nicolaos Charalambous, kende lo forma e tim di ekspèrto ku Kòrsou lo bai traha kuné.
Pa mas informashon di tur e desaroyonan rondó di Minister Camelia-Römer su akshonnan por bishitá e pagina di facebook “Minister Suzy Camelia-Romer”.