ORANJESTAD -- Aruba Weightlifting Association lo celebra un bes mas nos dia nacional Himno y Bandera cu un tremendo competencia di hisamento di peso pa tur su miembro y afiliadonan esaki riba diadomingo 20 di maart proximo.
E demas atletanan por competi den e categorianan di Hubenil, Junior, Senior y Masters. Mas cu claro nos por aprecia e miho atletanan di pesas den accion sin lubida e atletanan di Crossfit kendenan pa algun aña caba ta engrandese e deporte di pesas door di participa na e diferente competencianan organisa door di dicho federacion.
E clubnan di Crossfit participando e biaha aki na e competencia ta Muscles and Lungs Crossfit, A297 Crossfit, Barbell in Paradise Crossfit y Buchi Athletics Crossfit. No por keda sin menciona e atletanan di pesas mes manera Jennifer Piter, Ulrich Hoek y Joel Kuiperi cu cada bes durante di un competencia local ta logra kibra un record tras di e otro.
Cada bes e competencia di pesas ta uno emocionante pa mira ya cu e atletanan tur ta bini y duna e maximo di nan mes pa cay den premiacion. E competencia di hisamento di peso Himno y Bandera lo tuma luga den e cas di pesas esta Centro Deportivo Frans Figaroa na Noord. E competencia lo inicia pa 11or di mainta mientras ya for di 9or lo cuminsa cu e pisamento di e atletanan. Tur amante di hisamento di peso y e bario di Noord completo ta keda cordialmente invita pa ta presente na e competencia celebrando asina nos dia nacional Himno y Bandera.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di hisamento di peso relaciona cu e celebracion di nos dia nacional Himno y Bandera.
Cumprando weganan di Lotto, e Loteria di Aruba manera Catochi, Big 4, Zodiac, Wega di Number Korsou, Lotto di Dia, Lotto 5, Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.