WILLEMSTAD (PAIS) -- Partido PAIS ta kontentu ku nos pais tin un Plan di Desaroyo pa Kòrsou aprobá.
Ta masha importante pa kada pais tin un direkshon di largu plaso pa su desaroyo. Esaki ta muestra di madures i di mira pa futuro generashonnan na lugá di wak e próksimo elekshon, lokual a karakterisá nos pantaya polítiko muchu tempu.
Den esaki nos ta rekonosé e trabou di èks Minister Stanley Palm ku a tuma e desishon pa trese tres plan di desaroyo ku paralelamente tabata keda desaroyá pa tres ministerio diferente, den un solo Plan di Desaroyo pa Kòrsou i trese e plan aki dilanti den e plataforma di Diálogo Nashonal. Esaki a funshoná pasombra e a duna e plan e sosten amplio di tantu Gobièrnu, komèrsio, i sektor sindikal. Ta na su lugá pa felisitá tur gremio ku a partisipá den e plataforma aki, Gobièrnu i tambe e aktual Minister di Desaroyo Ekonómiko ku a kontinuá ku e trabounan hasí pa Stanley Palm.
Pa e Plan aki tin éksito nos mester hasi tres kos. Na di promé lugá mester di e determinashon polítiko pa ehekutá e plan aki; nos mester kambia nos manera di midi progreso i mester introdusí e metodologia di Human Development Index ku ta keda utilisá pa Nashonnan Uní i na último lugá, mester lanta un Planbureau. Esaki por sierto ta algu ku Minister van der Horst ta poniendo e toke final na dje.
PAIS lo brasa e puntonan di salida di e Plan di Desaroyo pa Kòrsou den e plan di akshon 2016-2020 di Partido PAIS ku ta keda desaroyá na e momentu aki. Ku esaki nos ta indiká tambe ku nos ta sostené nos Plan di Desaroyo pa Kòrsou.
Nos pais a dal un pasa gigantesko pa ku su desaroyo.