WILLEMSTAD -- Servisio pa Obra Pùbliko (OW) huntu ku Departamentu Tékniko di Tráfiko di Polis (KPC) ta anunsiá ku ta kuminsá drecha Santa Rosaweg den tres trayekto.
Dos (2) di e trayektonan aki ta kuminsá aworaki i un (1) ta kuminsá den 2016. E tres (3) trayektonan aki ta na enkargo di kontratista Curaçaose Wegenbouw Maatschappij (CWM) i nan detayenan ta lo siguiente.
Trayekto 1 ta rekonstukshon di Kaminda Rignald S. Recordino for di Marchena Harware na Beurs te na krusada di Kaya Rignald S. Recordino/Kaya Kent u Zelf. E trabounan a kuminsá dia 27 di ougùstùs i ta dura mas o menos 4 luna. E trabounan aki ta enserá: 1) kibra e asfalt, 2) saka e fundeshi daña, 3) pone un fundeshi nobo, 4) pone asfalt bèk, i 5) traha alsera tur dos banda di kaya pa peaton por kana.
Trayekto 2 ta rekonstrukshon di Santa Rosaweg for di Kooyman Santa Rosa te ku Katunastraat. Den e siman di 24 di ougùstùs e trabounan aki a kuminsa i lo dura mas o menos 8 luna. E trabounan ta ensera: 1) traha un rotònde na e krusada Sta. Rosaweg/Seru Loraweg/Kaminda Hensley ‘Bam Bam’ Meulens/Kaminda Rignald S. Recordino, 2) alsa seguridat di tráfiko den e áreanan kaminda tin skol, misa i negoshi, 3) krea espasio pa peaton por kana, 4) traha algun krusada elevá, 5) pone separashon físiko riba e kaminda, 6) drecha iluminashon públiko, i 7) asfaltá e kaminda di nobo.
Trayekto 3 ta rekonstrukshon di Santa Rosaweg for di Toni Kunchi, esta na Kaya Dr. Oy Sprock, te na Kooyman Santa Rosa. Lo ehekutá e trayekto aki den 2016. OW lo informá di e trabounan aki na debido tempu ora ku nan ta bai kuminsa.
Despues di e trabounan aki tur habitante, komersiante i komunidat en general lo por hasi uso di un área renobá kaminda fluho di tráfiko lo kana hopi mas mihó i asina minimalisá aksidentenan grave na e sitio aki.
Durante ehekushon di e trabounan ta desviá tráfiko i pa medio di barínan oraño, bòrchi di indikashon i señalnan lo indiká e rutanan alternativo. E desviashon pa e trayekto di rekonstrukshon di Santa Rosaweg for di Kooyman Santa Rosa te ku Katunastraat ta enserá ku por hasi uso di Kaya Tuna, Kaya Pita, Kaya Milon di Seru, Aloestraat, i Wayacastraat pa por sigui di Santa Rosaweg pa bai den direkshon di Montaña.
OW, KPC i kontratista CWM ta pidi tur outomobilista pa tene debido kuenta ku e kambionan i kore ku e koutela nesesario. Nos ta pidi komprenshon di komunidat i ta gradisí di antemano pa e koperashon.
Mirando e embargadura di e proyekto, nos lo tene un seshon di informashon mas pa tur habitante i komersiante di e área konserní. Keda pendiente di e invitashon ofisial pa esaki.