WILLEMSTAD (OM) -- E proyekto piloto "Tienda di Prevenshon" den bario di Nort Santa Rosa a resultá un éksito.
Esei por konkluí for di un ultimo enkuesta ku a tene bou di habitante den bario.
For di e enkuesta a sali na kla ku benta di droga i molèster den bario a baha. Poste di lus a keda kambiá. A pone mas poste di lus den bario. Sushi gròf i sushi den bario a keda eliminá. Molèster di hóbennan molestioso a baha. Músika duru i eksesivo na snek den bario di nort Santa Rosa a baha. A tene „safety-scan‟ den bario i a papia ku habitantenan tokante prevenshon di kiebro i atrako. A ofresé habitantenan material pa prevení kiebro i atrako. Un „neighborhood-watch‟ via WhatsApp a bira operashonal den un parti di e bari i a pone bòrchinan pafó di bario ku ta indiká ku e bario a uni nan mes den prevenshon. For di e enkuesta por konkluí ku kriminalidat den bario a baha miéntras ku habitantenan ta haña ku nan sentido di siguridat a halsa. Nan mes ta haña ku nan ta mas mihó prepará awor.
“Nos a hasi un kambio den bario i a duna un buèlta positivo den bario di Nort Santa Rosa. Ministerio
Públiko i su partnernan ta hopi satisfecho ku e logro aki”, asina Fiskal Mayo Heiko e Jong a bisa djaweps durante un reunion di evaluashon. Na e reunion di evaluashon a partisipá tur partner, esta Ennia, Ministerio di Hustisia, KPC, Kooyman NV, Forensic Services, Aqualectra NV i Selikor NV.
Sigun De Jong e team di “Prevení i Protehá” a logra di akumulá hopi sabiduria riba e tema. “Nos tin kaminda pa sigui traha awor. Ya kaba otro siudadanonan di otro bario a aserka nos pa yuda i halsa prevenshon den nan bario. Ministerio Públiko i su partnernan ta dispuesto pa duna un man na unda esaki ta posibel. Un eksigensia ta si ku petishon mester bin di e bario mes. Si tin hende pa trèk e proyekto, anto e ora ei nos lo ta dispuesto pa yuda ku konseho i yudansa”, di akuerdo ku Fiskal Mayo.
News Category:
Language:
Tag:
