ORANJESTAD -- E dianan 22 pa 26 di april proximo lo tuma luga na Puebla Mexico, e “Campeonato Panamericano de Campeones - 2016” organisa pa e Pan American Bowling Confederation (PABCON) hunto cu e federacion mexicano di bowling.
Diahuebs mainta e dos bolichernan femenino Kamilah Dammers y Shakaina Guerrero a biaha pa Mexico, unda nan lo representa Aruba den e magno evento di bowling. Mas cu 25 pais di e continente Pan Americano lo ta formando parti di e torneo aki unda lo bataya pa e titulo di "Campeon di e Campeonnan". Mester bisa aserca cu tres pais lo clasifica pa e Mundial di bowling cu lo tuma luga otro anja 2017 na Polonia. Tanto Kamilah como Shakaina a sigui un preparacion debido y ta cla pa enfrenta e mihonan hungadonan di bowling di nos continente. Un palabra di exito na ambos bolichera como tambe na coach Chris Dammers.