ORANJESTAD -- Na incio di siman cu a pasa e proyecto ambicioso 'Smart Community Aruba' a haya su señal di start.
Esaki a sosode durante un ceremonia destacante na e luga unda e comunidad sostenibel aki ta bin na Kibaima. Un proyecto conhunto cu ta bay consisti di 20 vivienda segun tecnologia moderno y sostenibel. FCCA ta e instituto cu ta bay guia e proyecto aki. Durante un entrevista cu Jose Paula di FCCA, hefe di e sector ' bouwtecniek ' el a splica un que otro di e proyecto.
Jose Paula: "Desde cu na 2012 e pregunta a bin di parti di gobierno y TNO si nos di FCCA ta interesa den construccion di un 'living lab' mi a wordo envolvi den e proyecto aki." Paula a splica cu e motibo di tardansa di e awe yama 'smart community' tin diferente motibo. Asina cu e bario a haya sa cu FCCA ta bay construi vivienda eynan e habitantenan a pensa cu esaki lo ta casnan social y esey no a cay mucho bon. "Pero nos di FCCA ta mas tanto pa financia hende pa traha nan propio cas. Nos mester a convence e habitantenan cu aki ta trata di casnan pa un grupo di enfoke completamente otro. Un otro motibo di tardansa ta cu normalmente FCCA ta traha su so y aki nos ta traha cu seis diferente partner cu mester tene cuenta cu nan y e di tres motibo ta cu na inicio a keda palabra cu cada partner ta percura pa su parti. Cierto momento FCCA a haya e peticion di gobierno pa tuma e parti di infrastructura tambe riba dje. Basa riba esaki FCCA mester a haci cierto decisionnan interno. Siman pasa diabierna gobierno y FCCA a yega na otro. Asina ta cu aparte di e casnan e infrastructura tambe ta wordo financia door di FCCA. Asina aki tur puzzelstukjes a cay na nan luga na mes momento".
Paula a splica cu na Kibaima ta bay bin 20 cas. 15 di nan a wordo diseña na e manera tradicional. Esey ta e base, pero cada cas ta haya algo aserca y asina ta sigui. "Asina bo ta haya cu cas nr. 15 ta un cas cu ta energie neutraal. Esey ta interesante na momento cu bo kier traha un cas nobo. Na Aruba tin 40 mil cas. Asina ta cu nos ta bay busca informacion di cas nr. 1 te 14 con a haci e extra nan riba cada cas. P.e. si bo isola e cas di parti pafo of isola bo dak di cas of bo ta pone dobbel glas na porta y bentana, anto mester wak kico tur bo ta spaar na energia. E informacion aki nos ta bay comparti cu comunidad despues di un periodo di algun aña. Asina e comunidad mes ta dicidi kico ta e extra (add on) cu ta bay haci riba nan cas pa gasta menos energia loke nos tur kier. Esaki ta esencia di full e proyecto aki. Mas oro habitante di casnan por ahusta nan cas cu cosnan chikito y ya caba spaar placa."
Pa loke ta e cinco otro casnan esey ta algo completamente diferente. "Pa medio di un concurso nos ta bay construi e casnan ey. Nos ta bay invita tur arkitecto local y esnan internacional tambe ta bon bini pa participa den construi e cas di futuro. E casnan aki mag di costa te cierto suma so pa asina cada participante hinca tur su creatividad den e proyecto. Pa medio di material uza, nobo y recicla. Nan mester percura pa bin cu un diseño cu ta tanto bunita como energiezuinig. " Paula a splica cu e huur di e casnan ta bira uno comercial. Pronto e construccion ta bay cuminsa.