WASHINGTON, DC, U.S.A. /ORANJESTAD -- Embahador di Reino na Washington Henne Schuwer tabatin Prome Minister di Aruba mr. Mike Eman y señora Doina Eman hunto cu Minister Plenipotenciario drs. Andy Lee como su invitadonan na e fiesta di celebracion di 'Dia di Rey'.
Banda di a celebra e hacimento di aña di Su Mahestad Willem-Alexander, Eman y Schuwer a discuti algun topico. Schuwer kier a enfatisa cu e ta embahador di Reino, esey ta nifica cu e ta embahador di Hulanda y tambe di e islanan Caribense di Reino.
"Nos a papia riba e topico ey mes. Con ami como embahador ta duna contenido na e posicion di ta embahador di Hulanda y e islanan. Tambe nos a papia di e posicion special di Aruba riba tereno di medio ambiente. E rol di guia cu Aruba ta hunga den haci e islanan 'berde'. Prome Minister ta hunga un papel importante den esaki y kier papia cu institucionnan riba e rol aki ya cu Aruba kier ta 'carbon neutral' na 2020." Schuwer a bisa cu Aruba kier hopi riba tereno di sostenibilidad y ta busca tur forma pa logra esaki. Pero Aruba ta un isla chikito. "Ora bo ta chikito, bo mester bula mas halto. Nos tin masha gana pa hunto cu boso representante aki bula mas halto posibel poniendo asina atencion riba e vision di Aruba. E bishita di Prome Minister Eman aki ta importante, pasobra door cu e ta Prome Minister e ta haya mas atencion y por habri portanan pa nos. Nos por flollow up y bisa otronan 'hey, wak e isla aki con bon e ta bayendo, dun'e boso atencion y despues sigui pa e otro islanan den Caribe."
Pa loke ta envolvimento den Reino di Aruba como partner Schuwer a splica cu un Reino cu ta consisti di 4 partner ta mas cu hopi ta pensa di Hulanda den Europa. "Hulanda tin un parti den Caribe y esey ta importante. Si mira rond kico ta pasando cu e politica di Merca na Cuba y Caribe, mi por bay na e departamento di Estado y bisa 'wak, mi ta un partner interesante pa bo, pasobra nos ta mas cu solamente Europeo, nos ta tambe parti di Caribe y papia cu nos riba asuntonan Caribense'. Merca ta bay ta willing pa haci esey."
Aruba ta trahando duro pa ta un hub entre e continentenan. Riba esaki e embahador tabata masha cla. "Loke Merca ta buscando ta un luga sigur y stabiel unda nan sa cu nan lo haya bon servicio. Mi ta kere cu e combinacion di Hulanda y cierto forma di stabilidad cu e ta trece y e islanan Caribense, na mi opinion ta un punto importante ora di 'bende' e deseo aki. Aruba por haci uzo di esaki y mustra riba e conexionnan cu e isla tin. Bo ta sigur cerca nos y haci uzo di nos como boso hub."