ORANJESTAD -- Daphne Lejuez, Presidente di Camara di Comercio tabata un di e stakeholdernan invita na e Learning Session ‘Natural Capital on Aruba.’
Tanto e gremio comercial como varios otro sector di nos comunidad a keda invita dor di Ministerio di Asuntonan Economico, Comunicacion, Energia y Medio Ambiente pa forma parti di e estudio di un aña cu ta bay evalua y duna un balor economico na naturalesa di nos isla.
E representante di Camara di Comercio a cualifica e iniciativa di Gobierno, pa duna e tarea na Yabi Consultancy y Wolffs Company pa haci un estudio na Aruba similar na uno cu a haci algun aña atras na Boneiro. E data cu sali afo di e investigacion lo ta un instrument balioso pa cada sector di nos comunidad pone den suma e impacto cu nan tin riba naturalesa.
“Ta importante pa monetarisa e balor y con ta bay anda cu ne; ki perdida nos ta bay tin si nos no cuida nos medio ambiente,” Sra. Lejuez a comenta. “Pa nos por logra e meta no solamente ta importante pa haci'e hunto y cu no ta un solo sector, pero diferente y stakeholders pa haci esaki.”
Presidente di Camara di Comercio ta convenci cu dor di duna un balor monetario ta haci'e mas facil pa hustifica e pakico mester conserva nos naturalesa. Actualmente e balansa ta dificil pa Gobierno wak te na unda ta sigui crece. Pero ora pone un balor monetario na e perdida, e ora ta ripara cua ta e momento pa marca un liña y con pa preserva loke tin.