WILLEMSTAD -- For di awe nochi, djaluna dia 16 di mei 2016, Emancipatie boulevard Don Martina, ta será kompleto pa tráfiko, for di 8’or di anochi te ku 4’or di marduga.
Durante di e oranan ei ta marka e kaya ku material dos komponente. Segun planifikashon di kontratista MNO Vervat, e trabounan na Emancipatie boulevard Don Martina ta dura un máksimo di tres anochi. Duranti di dia, e kaminda ta habrí normal pa tráfiko.
E trabou aki ta inisio di un proyekto di markamentu di kayanan di Kòrsou ku material mas duradero ku fèrf. Minister Suzy Camelia-Römer di Ministerio di Tráfiko, Transporte i Planifikashon Urbano no ke gasta sèn mas na fèrf ku ta kita despues di seis luna for di e kayanan. Despues ku el a palabrá ku spesialistanan riba e tereno, tantu lokal komo internashonal, el a disidí ku ta usa e material dos komponente ku ta mas duradero.
Durante di e trabounan ta desvia tráfiko. Un petishon ta bai for di e ministerio, Obra Públiko i polis tékniko, pa evita di kore riba Emancipatie boulevard Don Martina, si no ta nesesario. Por yega na Duana via di Zeelandia. Pa yega na Dok i Aqualectra mester kore via di Schouwburgweg. Habitantenan ta haña instrukshon kon pa yega òf sali for di nan kas. Kaminda e trabou ta tuma lugá tin outo ku lus i bòrchinan iluminá ku ta indiká ku e kaya ta blokiá. Tin hende ku por duna instrukshon tambe.
Por fabor sigui informashon via di korantnan, página di facebook di Minister Suzy Camelia-Römer i informashon via di radio i television pa bo keda na altura di e trabounan di markamentu di kaya. Ounke e trabounan ta duna un tiki molèster, e ta pa un kousa hopi importante, ku ta hasi nos tráfiko mas sigur.