WILLEMSTAD -- Djamars 31 di mei Rotary Club Willemstad ta organisá su di dos Walking Dinner den e ambiente dushi di Pietermaai.
Despues di e evento di aña pasá, kaminda tur karchi a kaba, e aña akí 11 restorant ta partisipá na e fundraising pa Fundashon Tur Ta Konta, ku ta ofresé muchanan ku ta bayendo skol èkstra guia pa loke ta kalkulashon i matemátika. E evento ta sirbi 500 bishitante un menú di 4 rònt, i ta sirbi kada rònt den un otro restorant. E restorantnan ta situá na distansha di kana for di otro, loke ta splika e nòmber ‘Walking Dinner’.
Walking Dinner; un komienso kreativo, un final festivo i 11 restorant ku ta partisipá
E aña akí e Walking Dinner ta kuminsá ku shampaña di Servir Frais i un amuse di Avila Beach Hotel, na e Kurá di Arte kreativo dilanti katedral di Pietermaai. E evento ta kaba na Bar 27 ku muzik baliabel i bibu. Meimei di komienso i final e bishitantenan ta kome na diferente restorant, entre otro Fishalicious, Mosa, Nr. 5, Saint Tropez Ocean Club, Déjà Vu, Cristal, Ginger,ScubaLodge i Mundo Bizarro.
Rob Kouijzer, inisiadó di e evento kulinario akí di Rotary Club Willemstad: ‘Loke ta hasi e fundraising akí spesial ta e echo ku riba un anochi bo ta bishitá diferente restorant ku bo tabata kurioso pa konosé, i kisas bo ta sera konosí tambe ku hendenan nobo i gezellig. Tur esaki pa un bon kousa. Preis pa e evento ta 150 florin pa persona i ta inkluí shampaña i biña.
Na komienso tur bishitante ta haña un mapa ku e ruta, kaminda tin stipulá den kua restorant ta kome kua rònt. Naturalmente parehanan ta keda huntu ku otro, i esnan ku ke kome komo grupo mester inskribí komo tal, ku un máksimo di 8 persona. E evento ta brinda oportunidat pa sera konosí ku hende nobo, ya ku ta kome na mesanan grandi i gezellig.
E aña akí un parti grandi di e fondonan rekoudá ta bai pa Tur Ta Konta, ku aña pasa a gana e Social Innovation Award Curaçao pa nan aserkamentu inovativo i eksitoso di edukashon.
Ku 140 tutor di kalkulashon ku ta bini di mundu di komersio, gobièrnu, enseñansa i otro boluntarionan, Tur Ta Konta ta ofresé alumnonan ku tin difikultat ku kalkulashon i matemátika semanalmente 1 ora di guia di persona pa persona. E atenshon personal akí ta duna resultado. Alumnonan ku tin guia di e tutornan di Tur Ta Konta ta logra mihó sifra di rapòrt i ademas ta haña mas konfiansa den nan mes i smak pa siña. Tur Ta Konta ke amplia su tim di tutor e aña eskolar binidero hasi 240 persona, pasó tin hopi nesesidat di e forma di èkstra guia pa kalkulashon akí.
Un plataforma di kalkulashon digital úniko pa Kòrsou
Ku e fondonan rekoudá Tur Ta Konta ta traha un foyeto di informashon i ta atkirí toolkits di kalkulashon pa tur skol kaminda nan ta aktivo. Ku e maletinnan di kalkulashon akí ku ta inkluí sinta pa midi, dobbelsteen, bekernan pa midi i sètnan pa traha ku breuken , e alumno- i nan tutornan por traha di manera práktiko i aktivo.
Banda di esaki e fundashon ta kuminsá – ku un promé inisiativa den e fundashon mes – ku desaroyo di un plataforma digital úniko, kaminda alumnonan por alkansá nan tutor online tambe, ora nan keda pegá ku algun materia di kalkulashon. Den futuro e plataforma akí mester krese bira un instrumento ku tur alumno di skol na Kòrsou, den Karibe i sobrá di mundu tin probecho di dje.
Mas informashon tokante Rotary Club Willemstad
Rotary Club Willemstad (RCW) ta un serviceclub motivá i gezellig. E 34 miembronan ta lùnch semanalmente na Avila Beach Hotel i ta traha aktivamente pa komunidat di Kòrsou. Esaki nan ta hasi pa medio di proyektonan hands on manera e Roefelproject i Curadoet, proyektonan pa hubentut manera e wikènt di liderazgo pa hóben di Rayla, i eventonan pa rekoudá fondo manera Rotarally i Duck Gala pa diferente bon kousa, prinsipalmente pa hubentut. Durante e añanan ku a pasa RCW a hasi donashon na un gran kantidat di bon kousa manera Fundashon Desaroyo Progreso, Bike4kids, Jeugdtheaterschool Drazans, Capriles Kliniek, kinderopvanghuis Encelia, Greenkidz, Fundashon pa maneho di adikshon i Hospice Arco Cavent.
Mas informashon tokante reservashon i benta di karchi
Por hasi reservashon i pago pa e Walking Dinner serka Rob Kouijzer (kouijzerrob@gmail.com, 516 2468) i Benno van Leeuwen (bennovanleeuwen@gmail.com, 522 3078). No por kumpra karchi durante e evento, pasó en konekshon ku hasimentu di kompra i organisashon di e ruta di restorant e kantidat di partisipante mester ta konosí adelantá.