ORANJESTAD -- Durante un recorido na Playa Prome Minister Mike Eman, a haya informacion riba desaroyo di e proyecto pa renobacion di centro di ciudad y bisindario.
Principalmente riba e trabounan andando con conecta waf crucero di Oranjestad cu Centro di Ciudad, creando un imagen nobo pa “haci nos soño pa alcansa un miho Aruba realidad”, Eman a bisa.
Eman compaña pa Minister di Infrastructura Benny Sevinger a bishita e trabounan na altura di Sun Plaza relaciona cu un sistema di riolering importante y tambe e area turistico dilanti di Waf di Oranjestad. “Un parti cu ta hopi importante pa nos ta e aspecto di renobacion di Caya Grandi y e area rond di Caya Grandi cu nos a bisa semper cu tin cu conect'e cu e area unda e mayor entrada pa un futuro desaroyo di Caya Grandi ta. Esey ta na nos area di waf,” Eman a expresa den un declaracion duna na final di e recorido.
E mandatario a splica cu na momento cu a diseña e renobacion di Centro di Ciudad, a haci esaki cu e pensamento cu mester conecta Centro di Ciudad cu e area unda cu ta drenta 800 mil turista pa aña. Esaki a wordo haci den cooperacion cu Minister di Turismo Otmar Oduber, Minister di Infrastructura Benny Sevinger, y Minister Mike de Meza di Asuntonan Economico y tambe di Waf. “Nos a diseña henter un area unda cu di momento cu e barconan crucero drenta nan no ta wak container mas, pasobra nos a construi un containerhaven y nos a haya henter e area di waf pa nos por renobe, revitalise y na mesun momento hacie hopi mas atractivo pa e turistanan cu ta yega via e frontera aki.” Cu Gobierno di Aruba ta haciendo un bon trabou a keda demostra den e expresionnan di elogio cu e mandatarionan a ricibi di turistanan na momento cu nan tabata canando den e area. Nan a wordo acerca door di varios turista cu a yega cu barconan crucero. Nan a bisa cu nan ta impresiona di e infrastructura di Aruba. Nan a bay hopi isla cu e mesun barco crucero aki y na ningun nan a mira inversionnan asina grandi, asina huicioso cu a wordo haci pa upgrade e calidad di e producto cu ta ofrece na e turista como local.
Den e diseñonan e waf ta uno exclusivamente pa barconan crucero. Na momento cu Containerhaven a bay Barcadera, a haya espacio pa cuminsa embeyece e area dunda cu e barconan crucero ta mara. Asina por mira un cambio den e area di Paardenbaaystraat y e parti su dilanti cu a haya e nomber di Rancho Plasa.
Ora cu e proyecto ta cla, tur e kiosknan cu tin awor no ta bay pa e otro banda, pero ta bini kiosknan nobo. E mesun personanan lo keda cu nan negoshi, pero den un forma hopi mas structura y organisa, lo bay tin nan kiosk na otro banda, directamente tambe cerca di e mercado, pa ora e turista yega. “Di e forma aki e aspecto di e kiosknan ta wordo kita y ta haci tambe cu henter e renobacion cu nos ta haciendo aki, cu nos ta yama Rancho Plasa, ta bay haya un aspecto bunita cu ta conecta na Paardenbaai Plasa,” Prome Minister Eman a splica.