ORANJESTAD -- E fin di siman aki ta uno special, cu entretenimento, prijs special y tambe un surtido amplio di mercancianan specialmente pa ‘Back to School’.
Coordinador special di OBID (Oranjestad Business Improvement District), Stanley de Marchena, cu ta traha riba entre otro organisa eventonan special den Caya Grandi, ta kere cu diasabra ta bay ta un dia caminda cu clientenan di Caya Grandi ta bay sinti nan mes den un esfera unico di compras cu Caya Grandi so por ofrece.
“Esaki ta e di tres siman,” sr. de Marchena ta splica, “cu nos ta organisando e Bazaar di ‘Back to School’ y e prome dosnan tabata un exito.” E simannan cu a pasa a mustra cu hopi cliente ta haci compras den Caya Grandi pa motibo di e bon ofertanan, surtido y e ambiente unico di e centro comercial. Parkeo tambe ta bira mucho mas facil y barata.
De Marchena: “E clientenan cu ta participa den e promocion di AruParking lo wordo beneficia cu descuento di parkeo. Y si nan cumpra 100 florin of mas y bay cu nan recibo AruParking, nan ta haya e ‘smartcard’ por nada.”
“Haci compras den Caya Grandi ta agradabel, diferente y e ta un experiencia,” De Marchena ta enfatisa. E fin di siman aki, ta bay tin DJ’s, bandanan live, Dino Jump, tambe Pokemonnan pa esnan mas ‘hoben’ cu ta gusta ‘Pokémon Go’ y mucho mas.
Orario y parkeo
E tiendanan den caya grandi ta habri for di 10'or di mainta te cu 8'or di anochi. Pa loke ta parkeo ta asina cu riba diasabra cu solamente dos florin tur hende por para nan auto pa tres ora. Tras di Botica Oduber tin un espacio grandi y tras di Arubus unda por para por nada. Mester registra e auto si na Aruparking pa por haci uzo di e parkeo liber aki. "Esaki ta algo positivo cu Aruparking ta coopera cu ne."
News Category:
Language:
