ORANJESTAD -- Prome cu e programa oficial tabata pone pa cuminsa, ya caba un grupo grandi di persona a reuni dilanti di MFA Paradera sperando inicio di e ceremonia di apertura.
Esaki ta un señal di e gran aceptacion cu e edificio ta hayando mey mey di e bario y tambe di e satisfaccion cu e comunidad tin pa cu maneho di Gobierno. Gabinete Mike Eman II a inaugura diahuebs anochi e di dos MFA riba e isla y mey mey di ciudadanonan, artista y representantenan di districto, como tambe di henter Aruba, a dedica esaki na bida, memoria y legado di Sr. Mito Croes.
Grupo Scout Casibari cu ta di Paradera, tabatin e honor di hisa bandera mientras cu ‘Aruba Dushi Tera’ a resona. Prome pa hiba palabra tabata Gerente General di MFA Paradera, sr. Elton Hart gradiciendo e confiansa poni den su persona y reafirmando su compromiso pa sirbi su pueblo. A sigui Director di SOGA, Sr. John Hodgson, kende a felicita e bario di Paradera, invita nan pa haci uzo di e facilidad y felicita Gobierno pa e bon manera con a traha riba e proyecto aki y otronan cu ta na caminda.
Entre discursonan e talento artistico di Paradera tabatin oportunidad di briya. E prome pa expone e rikeza aki tabata poeta Eribert de la Mare, yama tambe ‘Beach’ kende a declama poesia halando tur hende su atencion riba nos historia. Su tras tabata oportunidad di Director di Bureau MFA, Sr. Omar Harms pa dirigi algun palabra na e grupo grandi den audiencia. El a repasa e vision di Minister President Eman pa bin cu e concepto di MFA na Aruba y con esaki tabata un bet acerta. Tambe a felicita colega y miembronan di ekipo pa e trabou haci, recordando cu esaki no a caba.
Como titular di Infrastructura, Minister Benny Sevinger tambe hiba palabra caminda a resalta e bon trabou di arkitecto Jouel Croes y con ta e talento y experticio puramente local a hiba na realisa e edificio di MFA. Algo cu nos mester ta gradicido p’e y esey tabata hustamente un di varios tema cu otro artista di Paradera, Jonathan “Jeon” Thiel a regala e publico diahuebs anochi. Presente tambe na e ceremonia tabata Minister di Asuntonan Social, Paul Croes kende ta deliberando e idea pa ubica un sucursal di Departamento di Asuntonan Social den e edificio di MFA Paradera. Minister Croes a felicita e bario completo y tur esnan envolvi den e proyecto exitoso.
Na varios ocasion e mandatarionan a recorda dr. Mito Croes, yiu di Paradera, kende e edificio awo ta carga su nomber. Despues cu su señora a hiba palabra indicando gradicimento pa e honor y con defunto Mito lo kier a mira pa esaki funciona pa e pueblo di Paradera, Minister Mike Eman a sigui dunando un discurso hopi emotivo. Na final a laga luz ilumina e letternan di nomber riba e edificio y a corta cinta pa declara MFA Paradera oficialmente habri.
Por bisa cu esaki tabata un atardi pa anochi di hopi alegria, speransa, gradicimento pero tambe hopi celebracion pa e districto y pueblo di Paradera. No por tabatin miho manera pa clausura e anochi, cu e presentacion musical di un grupo tambe di Paradera, esta Paranda Ta Nos.