ORANJESTAD (MEP) -- Durante tratamento di Presupuesto 2017 nos a haci pregunta na Minister De Meza y Minister Schwengle riba e situacion for di man na e dump na Parkietenbos y e trabounan cu asbest riba e tereno di e refineria na altura di Fort Heuvelstraat.
For di nan contesta y e manera cu nan a scohe pa contesta a bira bisto cu tur dos Minister kier laba nan man di e situacion di e dump y asbest na e refineria.
De Meza Ta Haci Mofa Y Politikeria Baho
Enves cu Minister De Meza a duna un splicacion kico e ta haciendo pa e problemanan di dump, e mandatario a scohe pa chercha y cuestiona e veredicto di juez cu a bisa cu e proyecto di Bouldin & Lawson tabata bon.
Minister De Meza a tira culpa cu Pueblo no ta paga Serlimar, siendo cu el a lubida con e mes tempo di MEP a bisa cu recohe sushi mester ta gratis.
Banda di esaki e Minister a haci mofa di e molester cu e dump ta produci bisando cu ta pa mas di 80 aña ta asina caba dus no mester bin haci fanfaria awor. Y manera semper e mandatario a recuri na un politica baho ora cu ela bay insinua cu nos a yama e compania priva di recycla, procesa y kima sushi como criminal.
Ta lamentabel cu Minister De Meza ta haci mofa y politikeria baho enves cu e ta splica su plan pa caba cu e molester y pa sanea e situacion caotico na dump.
Riba e situacion cu asbest na e tereno di e refineria, e Minister a djies bisa cu tur cos ta ok y no a duna ningun splicacion na drechi. Asina e mandatario a laba su man di e situacion na dump y na e refineria.
Schwengle No Ta Sintie Prome Yama
Nos a puntra Minister Schwengle ken ta adverti e bario banda di e dump y tambe esnan banda di e refineria di e peligernan cu por tin pa nan salud. E mandatario di salud a indica cu e ta preocupa pa e asunto di dump, pero a splica cu no ta pasobra cu tin holor malo esaki kiermeen cu e huma ta malo.
Pero e mandatario a laba man bisando cu tin hende ta aserca Directie Volksgezondheid, pero nan no ta e promer yama pa atende cu e problema. Segun Minister Schwengle ta DTI mester midi aire na dump y tambe na e tereno di e refineria. Pero nos a compronde cu DTI ta percura solamemte pa e a seguridad di e trahador y no ta duna e bario ningun alerta of informacion di peliger. Segun DTI ta Directie Miliue mester check e procedura di trabou cu asbest y ta Directie Volksgezondheid mester informa e bario.
E habitantenan no ta hayando ningun alerta di e peligernan pa nan salud, ni na Sanicolas, ni na Parkietenbos y e Minister di Salubridad ta djies laba man bisa cu e no ta prome yama pa actua.
Tur Dos Minister Ta Laba Man
Ta tristo pa mira con dos Minister di nos Pais ta djies laba man riba e situacion cu tin na dump y na e tereno di e refineria cu ta pone nos medio ambiente y salud di hende na peliger. Tur dos Minister a kere cu si nan bin haci mofa, chercha, arogancia y ofensa nan lo desvia atencion di e realidad y e peliger di salud lo bira menos. Pero esaki solamente ta demostra nan mala fe y incompetencia pa atende y busca solucion pa nos Pais. E ta un berguensa grandi pa mira e dos Ministernan aki laba man di e manera aki.