ORANJESTAD -- Nos ta den e temporada di fin di aña.
Ta un tradicion cu nos hendenan ta prepara pa e dianan di fiesta di Pasco y Aña Nobo. Y manera cu aña habri, ta sigui ey mes su tras e celebracionnan di Carnaval. IBiSA ta keda corda tur atleta y comunidad di Aruba, cu e prome evento grandi riba su calendario di actividad pa aña 2017 ta e “Betico Memorial 10K Run” y ta importante pa keda den training.
E careda ta tuma lugar riba e fecha conmemorativo di celebracion di e ‘Dia di Betico’. Esaki ta riba diaranson dia 25 di januari 2017. Orario di salida di e careda ta 6’or di mainta for di Centro Deportivo Libertador Betico Croes na Sta. Cruz. Na principio di aña IBiSA ta duna mas informacion di e careda, entre otro e fecha cu inscripcion ta cuminsa.
IBiSA ta motiva tur atleta y deportista, como tambe henter comunidad di Aruba pa sigui prepara pa e careda aki cu tur aña tin un gran acogida di nos participantenan local, como di esnan internacional cu ta di bishita riba nos isla.
Como tips IBiSA ta conseha pa controla e cantidad di alimento y bebida cu ta ingeri durante e dianan di fiesta pa no afecta e parti di entrenamento y perhudica bo prestacion como atleta. Un bida activo y saludabel ta contribui sigur na felicidad. Laga nos tur disfruta sanamente di e temporada di fin di aña y carnaval, pa despues reactiva rapidamente cu e custumber di haci deporte, ehercicio y movecion. Tur esaki combina cu e parti di comemento saludabel pa completa un estilo di bida saludabel.
“Feliz y Saludabel Dianan di Fiesta”.