ORANJESTAD -- Oportunidadnan economico na 2017 ta grandi. Esaki ta e opinion firme di Minister Arends pa loke ta economia di Aruba.
"Inversionnan ta tumando lugar tur rond Aruba y esaki ta crea un ola di oportunidadnan. Reapertura di e refineria, cu pa prome bes a bira propiedad di pueblo di Aruba, unda no solamente inversionnan cuantioso di casi un biyon ta tuma lugar na 2017, pero tambe ta ofrece empleo na un cantidad grandi di hende cu na nan turno ta inverti bek den e economia di Aruba. E ta un efecto continuo. "
No ta solamente Minister Arends ta hiba e pensamento aki, pero tambe e mandatario mas halto di nos pais, Gobernador Refunjol. Den su ultimo discurso na ocasion di Aña Parlamentario Gobernador Refunjol a ilustra e pensamento aki na momento cu el a tira un bista riba futuro di Aruba, pasobra semper nos mester wak padilanti. Refiriendo na e aña cu ta bin Gobernador a bisa cu tur comienso ta contene un nucleo genuino di optimismo, fe y speransa. Esey ta loke ta e caso awor. Un di e puntonan cu Gobernador a enfoca riba dje ta cu gobierno a presenta un presupuesto cu un deficit di 0.5% di GDP conforme e normanan di ley di supervision financiero temporario. Esaki ta un resultado cu a wordo alcansa cu hopi esfuerso y riba propio forsa. Presupuesto 2017 no conoce aumento di tarifa di impuesto y ta fiha e prome paso pa un reduccion di debe di pais Aruba. E logro aki a wordo haci posibel danki na un maneho financiero balansa y sin ningun ayudo financiero externo.
Gobierno di Aruba ta invertiendo den varios proyecto y cada un di nan ta bay genera placa pa caha di gobierno. Proyecto Green Corridor ta canando y a inicia cu Watty Vos Boulevard - proyectonan cu lo hiba mobilidad riba Aruba na un otro nivel y aumenta productividad di infrastructura. E waf nobo di carga na Barcadera ta simbolisa un era nobo pa oportunidadnan economico den region: portanan lo habri pa e comerciante mediano y chikito, como tambe pa aliansanan strategico cu lo eleva Aruba na un nivel mas halto di desaroyo. Aruba ta bay haya un hospital moderno cu facilidadnan necesario cu tambe lo sirbi pa atrae turismo medico. E inversionnan aki ta crea oportunidadnan na 2017 y Aruba henter lo sinti su efecto den forma positivo.