WILLEMSTAD (PAIS) -- E lei pa koperá ku Merka den e lucha kontra di froude di belasting, a keda aprobá den Staten ku 11 vota na fabor i tres kontra.
Tur e tres votonan a bin di e frakshon di MFK.
E inisiativa Merikano aki, konosí komo Foreign Account Tax Compliance Act (FATCA) ta pa kombatí froude di belasting ku hopi biaha ta kondusí na otro aktonan kriminal manera labamentu di plaka i finansiamentu di terorismo.
Lider di Partido PAIS ta kontentu ku Parlamento a aprobá e lei aki. Rosaria: “Aprobando e lei aki Kòrsou ta reafirmá su mes komo un pais ku ta kumpli ku su promesanan di kombatí kosnan robes i posishoná su mes komo un sentro finansiero íntegro”. Promé ku tratamentu di e lei aki Rosaria a hiba kombersashon ku aktornan di e sektor bankario i finansiero internashonal ku a mustra riba e importansia pa nos pais aprobá e lei FATCA pa asina nos por sigui kompetí den e mundu finansiero global i mantené nos isla komo unu transparente i di kalidat haltu. Sektor finansiero di Kòrsou ta duna empleo na míles i míles di yu di tera.