WILLEMSTAD -- Dia 17 di sèptèmber último Banco di Caribe a hasi entrega di buki pa lesa na skol básiko Angela Jessurun.
Den kolaborashon ku Fundashon Editorial Sembra Buki a hasi e donashon aki pa konhuntamente kontribuí na desaroyo di nos muchanan. Di akuerdo ku sr. Dito de Kort, Managing Director di Banco di Caribe.
“Nos sá kon importante lesamentu ta pa e mucha. Dor di lesa buki e mucha ta stimulá su mente, ekspandé su konosementu i vokabulario, ademas di esaki e ta desaroyá abilidat di analisá, focus i konsentrá. E bukinan aki ta bira aun mas interesante pa e mucha ora ku e ta kontá den un ambiente konosí pa e mucha, entre otro na su mes pais. Ku e donashon aki Banco di Caribe ta sigui kontribuí na formashon di nos muchanan”.
E bukinan ta entre otro Waar is Olivier? / Unda Olivier ta?/ Ubuntu (skibí pa Diana Lebacs), Klapchi / Vürwèrk (skibí pa Monique Casimiri), Avonturen in Brakkeput (skibí pa Irene Braakman), E Buriku di Papa Timba (skibí pa Menki Rojer) i Vliegers Boven Buena Vista (skibí pa B.E Venero). Sra. Hoyer, direktora di Angela Jessurun, a keda hopi kontentu ku e gesto i a afirmá ku sigur nan skol lo hasi bon uso di e bukinan.