WILLEMSTAD, Curacao / ORANJESTAD, Aruba (CTB) -- Curaçao Tourist Board (CTB) y Curaçao Extreme Foundation a tene un encuentro cu prensa y amantenan di e deporte di velocidad esta ‘drag race’ na Aruba pa di manera oficial informa y invita nan pa participa na e prome edicion di Curaçao Extreme Finals 2015.
Despues di un exitoso Curaçao International Drag Fest ’15 na luna di april ultimo, e team di Curaçao Extreme Foundation a anuncia cu lo tin Curaçao Extreme Finals (CXF) den luna di december. E anuncio aki a haña hopi bon acohida tanto local komo den exterior. Hermana isla di Aruba semper ta participa engrande durante caredanan internacional na Curaçao, p’esey mes e team di CTB y Curaçao Extreme Foundation a tene un encuentro cu prensa y un media-tour pa asina duna tur informacion di e caredanan di CXF cu lo tuma luga na Curaçao International Raceway. CTB ta apoya y sostene eventonan cu proyeccion internacional y cu tin tur e potencial pa atrae bishitantenan for di exterior pa Curaçao. Durante e bishita na Aruba e team di Curaçao a probecha y a duna informacion amplio di tur e otro actividatnan cu lo tin na Curaçao di awor aki te cu januari 2016.
CXF lo ta dianan 3, 4 y 5 di december proximo. Paisnan cu ya a confirma nan participacion ta Aruba, Boneiro, Merca, Hulanda, Puerto Rico, Republica Dominicana, Venezuela y naturalmente Curaçao mes. Un invitacion special ta bay na tur e coredornan y fanatico di ‘drag race’ di Aruba pa ta na Curaçao pa disfruta di CXF y tur e otro atraccion y actividadnan cu Curaçao tin di ofrece. Un danki special ta bay na Clarion Hotel & Suites Curaçao i InselAir cu a copera ku e encuentro na Aruba. Pa mas informacion di e caredanan di CXF por bishita e pagina web http://www.curacao-extreme.com of e Facebook www.facebook.com/CuracaoExtremeFoundation.