WILLEMSTAD (MFK) -- Awe literatura i historia di Kòrsou ta yora. Frank Martinus Arion un hòmber di fe, ku kurashi.
Sin miedu di nada, a bai drumi den brasa di papa Dios. Frank a bin na mundu, pero speshal na Kòrsou pa kumpli ku un mishon. Su kurason tabata grandi. E no a drumi pensa so, pero el a lanta, papia sin tembla, tuma desishon, tin ora sin haña rason maske ku el a meresé. El a Perseverá, pone pen ku papel pa e skibi sintimentunan profundo di su pueblo, i sigi skibi pa hasi esun ku ke sabi. Su vishon tabata, pa kita pobresa mental for di su hendenan. Kibra kadena for di kurason i mente dje yu di tera.
Awa di wowo lo laba kara di hopi ku ta yegá na Frank. Esaki ta algu masha normal.
Pasombra yoramentu ta un sintimentu profundo ku e ser humano tin. Pero nos tur tin ku komprondé ku spiritu di historia I forsa di un kultura, ta biba mas largu ku e karni. Nos ta rekordá kon e hòmber aki a persistí pa lanta un skol na Papiamentu apesar di hopi resistensha.
Un hòmber ku semper a kere den e idioma Papiamentu i su historia. Su forsa a pone ku awe Papiamentu a haña un desaroyo i rèspèt ku e resultado ku awendia, universidatnan na mundu ta studia nos idioma Papiamentu.
Ami no ke bisa ku nos ta bai dera Frank.
Pero si mi ke bisa, ku nos ta bai hinka e simia bèk na tera, kaminda su rais lo sigui plama i produsí mas hende ku bon vishon, pa sigui defendé nos idioma, historia i kultura di Pais Kòrsou.