ORANJESTAD -- Manera ta conoci, recientemente a tuma luga den Cas di Cultura e evento TEDx cu tabata un exito grandi y algo unico na Aruba.
E ekipo tras di organisacion di TEDx, como gradicimento na Cas di Cultura pa nan sosten y aporte na e evento, kier a haci un contribucion na e esfuesronan cu tin na e momentonan aki pa renobacion di Cas di Cultura. E organisadornan, cu ta inclui Bureau Innovatie di Ministerio di Asunto general, Ciencia, Innovacion y Desaroyo duradero, a uni cu organisadornan di “Green's' Cool” pa haci un donacion na e centro cultural di Aruba.
E donacion ta consisti di stoelnan cu a figura entre e ganadonan di e competencia Green Chair Competition teni aña pasa. E piezanan aki ta bay forma parti di un subasta dia 24 di October proximo, di cual fondonan ta keda pa Cas di Cultura. E stoelnan ta riba nan mes obranan di arte, crea dor di studiantenan di scolnan secundario local, bou guia di nan docente di CKV y instruccion brinda di parti di e Academy of Fine Arts & Design.
Nan ta traha di diferente tipo di material cu normalmente hende ta deshaci di nan, pero cu den e caso aki y di un manera ingenioso, a keda re-usa. Mayoria ta funcional, pero sigur nan por fungi perfectamente den cualkier espacio, sea residencial, comercial of corporativo como un pieza di combersacion y muestra di e potencial di sostenibilidad y creatividad di nos hendenan.
Joan Hart, Coordinador di Cas di Cultura a ricibi, oficialmente, e donacion for di Veronica Olarte di Bureau Innovatie/Green ‘s Cool y Glen Goddijn, Coordinator Academy of Fine Arts & Design Aruba. “Nos ta masha gradicido paso nan a aporta na Cas di Cultura,” Hart a expresa. Dia 24 di October tin concierto y subasta cu e proposito di colecta e fondonan necesario pa busca conseho di arkitecto pa renobacion y mehoracion di Cas di Cultura.