ORANJESTAD -- Dos aña pasa, bou iniciativa di Prome Minister Mike Eman a cuminsa cu e proyecto ‘Hoben y Talentoso’.
Cu e proyecto aki ta traha pa stimula hobennan riba e trayectoria di nan bida pa bira adultonan responsabel. E exito di un persona no ta contribui unicamente na satisfacion y bienestar di e persona mes y esnan rond di dje, pero e ta contribui tambe na e espirito positivo y logronan di un pais completo. Sea ta den e rol di mayor, maestro di scol, como parti di e forsa laboral, como entrepreneur of trabou boluntario.
Presidente di e Comision Hoben y Talentoso Sr. Maurits Malmberg a conta cu den e prome aña di e proyecto a traha un asina yama “weekly planner” pa tur alumno di scol secundario na Aruba. Pa e edicion di aña pasa a crea un “Award Book” cu ta reconoce y ilustra e asina yama ‘Role Models’ aki pa nan por inspira tur otro hoben di nos pais y sinti nan influencia positivo. Un influencia cu nan mes tambe a uza pa bay dilanti den bida y logra metanan grandi. Mester bisa cu e aña aki lo reconoce 28 hoben cu a destaca den diferente area manera deporte, arte, musica, baile, enterpeneurship, innovacion y educacion. Cu e ‘Award Book’ ta spera cu esaki por yuda hobennan stimula nan exigencianan ora nan ta para dilanti retonan cu bida ta trece cun’e. Esaki dor di uza nan talentonan pa gara e mundo cu dos man pa logra surpasa cualkier dificultad den bida. Otronan a bay nan dilanti y a logra.
Comision Hoben y Talentoso ta contento di por reconoce nos propio talentonan local cu a lo largo ta e heroenan cu nos muchanan y comunidad completo ta admira. Como ehempel por pensa riba hobennan cu na un edad relativamente hoben a logra metanan grandi. Ehempelnan ta Xander Bogearts den Boston Red Sox of Sarah Quita Offringa cu a logra bira ocho bes campeon mundial den surfing. E dos hobennan aki tabata recipiente di e premio di Hoben y Talentoso di 2013.
E proyecto Hoben y Talentoso 2015 ta clausura cu entrega di e Award Book Hoben y Talentoso 2015 dia 4 di November den un evento red carpet na Cas di Cultura.