WILLEMSTAD -- Gobièrnu di Kòrsou a reuní awe, durante di e reunion di Konseho di Minister semanal, ku diferente stakeholder pa atendé un “beslag” ku resientemente gruponan di organisashon di medio ambiente i otro personanan a pone riba Refineria Isla, a base di un veredikto di hues data for di aña 2010.
E stakeholder nan ku tabata presente ta entre otro e tim multidisiplinario MDPT, Curoil, Refineria Isla, Aqualectra, representantenan dje diferente sindikatonan di trahadó den Isla i e direktorado pa Kontrol di Riesgo i Maneho pa Kalamidat.
Mirando e posibel konsekuensha i efektonan ku un “beslag” asina por tin pa ku seguridat, kontinuashon di entrega di kumbustibel i teniendo na kuenta ku un situashon asina por perhudiká i stroba diferente desaroyo den komunidat di Kòrsou, Gobièrnu di Kòrsou a skohe pa uni su mes ku e stakeholder nan i Refineria Isla pa kita un “beslag” asina for di mesa.
Gobièrnu di Kòrsou tin e responsabilidat pa garantisa stabilidat, siguridat, trankilidat i e situashon sosial-ekonimiko di pais en general. E suministro di energia, pues di awa, koriente i gasolin ta forma un parti grandi di e garantianan ku Gobièrnu mester duna.
Esaki ta nifiká pues ku Gobièrnu di Kòrsou no por akseptá un menasa direkt òf indirekt pa ku kontinuashon di e.o. entrega di energia, produkshon di awa i koriente, servisionan di emergensia, menasa pa kuponan di trabou, nos aeropuerto, etc.
Basa riba e responsabilidat aki di Gobièrnu di Kòrsou a skohe pa uni ku e diferente stakeholder nan pa via di e kaminda nan apropia kita e menasa aki for di mesa.