ORANJESTAD (MEP) -- Sr. Rene "Baba" Herde ultimamente den su desesperacion ta papia un hala disparate.
Ultimo por a lesa un comunicado di dje cu ta papia di e unico exito di MEP den ultimo 6 añanan. Tambe den un otro comunicado el a papia di tur e hazañanan cu su gobierno a haci despues cu nan a drenta gobierno na 1986. Ta pesey lo ta bon pa refresca Rene Herde su memoria, bay un rato den historia y recorda e periodo di 1986-1988, caminda su gobierno di AVP tabata tin e “exito” pa den 3 aña di tempo endeuda nos pais cu e tur e garantianan di e hotelnan fracasa, esta e ruinanan di Beta, Plantation y Ramada.
Bancarota 1986-1988
Rene Herde den su ignorancia no ta conta pueblo con e tempo ey su gobierno di AVP a haya consehonan di Banco Central, World Bank y Pannell Kerr & Forster pa NO triplifica e cantidad di cambernan di hotel, debi na e infrastructura y otro facilidadnan limita di nos pais. Tur e instancianan aki a conseha pa solamente redobla e cantidad di cambernan di hotel e tempo ey loke tabata suficiente pa crea cuponan di trabao pa nos Arubianonan y cu nos no tin nodi importa un gran cantidad di trahador for di exterior. Sinembargo Gabinete Eman 1 no a sigui e consehonan aki y a dicidi di triplifica toch e cantidad di cambernan di hotel. E resultado di esaki ta conoci caba pa un y tur. Pais Aruba a keda cu un debe di garantia di 206 miyon dollar (400 miyon florin) pa paga na e Italianonan di SACE y cu finalmente tabata ex-Premier Nelson Oduber y ex-Minister Nilo Swaen mester a bay te Italia pa negocia pago di e debe astronomico aki y cu a logra reduci e debe aki cu 100 miyon dollar. Sinembargo nos pais tin cu keda paga durante 15 aña largo tur aña un suma di 10 miyon florin y cu e pago final lo bay ta te dia 31 di maart 2018.
Bancarota 1994-2001
Pero ta conoci caba cu AVP nunca ta lubida su mal mañanan, ya cu na momento cu nan a haya un chens atrobe pa drenta gobernacion na 1994, den apenas 7 aña di tempo nan a bolbe ruina e pais cu tur e deficitnan astronomico, debenan di Fondo Desaroyo Nobo San Nicolas, Radar, Race Track, Winston & Strawn, APFA, AZV, Radisson etc. Pero manera a bira un custumber caba finalmente ta MEP mes mester a drenta gobernacion na 2001 pa bolbe soluciona pago di tur e debe y bagamunderianan aki di AVP.
Bancarota 2009-2015
Un cos cu siguramente mester duna credito na AVP y esaki ta cu nan – despues di nan engaño y manipulacionnan durante eleccion 2009 - a bolbe haya oportunidad pa drenta gobierno y un biaha mas a bolbe ruina y manda e pais aki den bancarota den apenas 6 aña di tempo. Hecho ta cu Rene Herde sin ningun tiki di berguensa kier pinta e periodo aki di Gabinete Mike Eman como algo sumamente positivo, pero cifra y comparacionnan mundial no ta gaña y ta mustra e realidad amargo cu Aruba ta bibando aden actualmente.
Ta cu orguyo y satisfaccion pa mira con na 2009 (Gabinete Oduber) pais Aruba tabata figura como number 12 entre tur e paisnan importante na mundo cu un deficit financiero di apenas -3.6%. Pero den apenas 5 aña e gobierno di AVP a pone pais riba mapa mundial cu un record na deficit financiero di -9.3% na 2014, algo insolito y nunca visto desde cu Aruba a drenta su Status Aparte. Den e tabel adhunto por mira cu tur pais na mundo – te hasta paisnan manera Grecia, Spaña y Portugal – a logra baha nan deficit financiero den 5 aña di tempo, pero ta e gobierno di Rene Herde so ta logra algo ‘impresionante’, caminda nan a mas cu redobla e deficit financiero. Den e siguiente comunicado partido MEP lo amplia riba e demas barbaridadnan ventila ultimamente pa e lider di fraccion di AVP, Rene Herde.