ORANJESTAD -- Glenda Heyliger ta un di e artistanan encarga cu e proyecto di Aruba Mural Projects (AMP) cu lo wordo desvela diahuebs awor na San Nicolas.
Glenda ta un artista multidisciplinario, el a haci teatro na Rietveld, fashion designing y fuera di esey e ta un analista di microbiologia. El a yega di haci trabounan grandi den arte, pero pa bay haci un obra di arte riba muraya ta su prome biaha.
Glenda Heyliger ta bisa cu e proyecto aki ta un reto unda cu e mester wak kico ta bon pa San Nicolas y kico ta bay crea. El a scohe e dos piedranan di Casibari Rock Formation cu e trapi memey cu ta representa e comunidad cu su diferente situacionnan. Pa Glenda e ta representa tambe pariba y pabou di brug formando un comunidad hunto cu 80 diferente culturanan respetando tur hende.
“Nos antepasadonan a crea un caminda pa nos bay dilanti y nos mester crea algo pa nos mes y nos hubentud pa sigui bay dilanti”. Lo cual cu Glenda ta pintando ta tur e situacionnan cu a tumando lugar den e barionan, e ta wordo expresa den un forma abstracto y ta resalta cu nos mester tene man hunto.
E artista ta haya e proyecto di AMP uno hopi bon y e kier wak ora tur e murayanan pinta dor di diferente artista ta cla y pa nan tur para banda di otro pa wak kico Aruba tin, pasobra nos isla tin hopi talento y mester tuma esaki na serio. Si haci esaki y aprecia nos mesun artistanan, nan lo sobresali hopi mas.
Pa loke ta maneho di Minister di Cultura pa haci San Nicolas e centro di nos historia cultural, Glenda Heyliger a bisa cu esaki tabata falta pasobra pa hopi aña nada no a wordo haci pa San Nicolas. Contrario na e tendencia aki, awor ta visibel cu algo drechi ta wordo haci.