ORANJESTAD (BNA) -- Den cuadro di Festival di Buki pa Mucha 2015, Biblioteca Nacional Aruba en cooperacion cu Cas di Cultura ta presenta un show cu diferente autor cu ta participa na Festival di Buki pa Mucha, diadomingo 1 di november, na Cas di Cultura di 4or y mey pa 7or y mey.
Esaki ta un regalo pa e muchanan di Aruba y entrada ta completamente gratis. Tur esnan interesa pa ta parti di e show aki por pasa busca carchi di entrada na Biblioteca Nacional Aruba (G. Madurostraat) durante henter dia.
Alabes kier haci un invitacion na un y tur pa ta presente na e apertura (diabierna 30 di october) di e Festival di Buki pa Mucha di 5:00-8:00 p.m. cu lo tuma luga patras di edificio di Biblioteca Nacional Aruba na George Madurostraat 13.
Como invitado special Curt Fortin, autor di e buki Een Reu… reu… reuzenslang! Un Co… co… colebra grandi! cu ta e regalo di siman di buki di e aña aki. Curt Fortin ta e orguyo di Aruba y ta conoci na Hulanda den diferente pelicula y serie di television HoelaHoep. E show cu Curt Fortin lo presenta ta basa riba su obra Yakanuko. Nos lo combina e atardi aki cu diferente otro artista/autor cu ta participa na Festival di Buki pa Mucha e aña aki. Bini uno bini tur pa keda inspira pa sigui lesa.