ORANJESTAD -- Ademas di e ofertanan tremendo y ambiente dushi cu ta bay tin diasabra awo den caya, a bin un atraccion mas aserca.
Di dos piso di edificio Nikki Habibe a keda comberti den un spookhuis pa asina celebra e fin di siman aki di Halloween. Mientras cu e Bazaar den Caya Grandi lo dura diasabra henter dia, por disfruta di e Paranormal Hotel Aruba ya caba for di diabierna anochi y te cu diadomingo anochi. E spookhuis ta un iniciativa di comerciantenan Raul Amundaray y Fernando Vermeer cu e meta pa hala mas hende pa e parti pariba di Caya G.F. Betico Croes.
Basa riba e serie exitoso di pelicula di teror, Paranormal Activity, e spookhuis of haunted house aki ta bay habri su portanan solamente diabierna, diasabra y diadomingo entre 8or di anochi y 12’or di marduga. Entrada ta obtenibel na e Ticket Center na Nikki Habibe, como tambe na Cono Pizza na balor di 10 Florin, cu oferta special di 15 Florin pa tres carchi. Ta evaluando si ta haci un version menos tenebroso y mas trempan pa muchanan mas chikito. Keda pendiente di esey, riba e pagina di Paranormal Hotel Aruba riba Facebook.
Pa loke ta trata e Bazaar di Halloween, ya for di mainta comerciantenan ta bay pone nan tent pafo cu e mercancia na oferta. Mayornan ta invita pa bin cu e muchanan pa gosa di e Dino Jump. Ya mas den e parti di atardi pa nan disfrasa y haci trick or treat den e diferente tiendanan. Comerciantenan a ser pidi pa tin mangel pa asina reparti entre e muchanan. Lo tin hopi movecion y entretenimento musical, como tambe diferente restaurant y cafe cu nan stoel y mesa pafo pa asina disfruta di e ambiente.