ORANJESTAD -- Minister Otmar Oduber tabatin un reunion cu e delegacion completo di Reino Hulandes presente na Paris, Francia den cuadro di e reunion general di UNESCO.
Presente na e reunion aki tabata e delegacionnan di Aruba, Corsow, Sint Maarten y Hulanda, representa pa Minister di Enseñansa Cultura y Ciencia.
E reunion tabata uno fructifero unda perspectivanan a wordo intercambia riba e relacion di e islanan den Reino y e comunicacion entre nan. A bin diferente puntonan critico constructivo dilanti cu a duna Hulanda e perspectiva di e islanan den Caribe. Combersacionnan tabata ameno pero fuerte unda puntonan valido a bin dilanti y tambe plannan concreto pa mehora e comunicacion entre e islanan mescos cu e transparencia necesario.
Despues di e reunion aki Minister Oduber y su colega Bussemaker a sinta den un reunion bilateral unda a toca algun tema relata cu nos herencia inmaterial, e pasonan cu a wordo tuma pero tambe e retonan y espacionan cu por tin e posibilidad pa colaboracion entre Hulanda y Aruba.
Tambe a toca e tema di nos monumentonan y e pasonan grandi cu Aruba a tuma pa salvaguardia nan. A haci un peticion na Hulanda pa sigui sostene e pasonan aki, caminda tur dos partido por beneficia di esaki.
Un otro punto cu a atende cu ne ta e ultimo desaroyonan den mundo di museonan unda a duna un relato di e desaroyonan y a toca e puntonan unda cu lo por colabora cu Hulanda.
Un combersacion cu varios puntonan positivo treci dilanti unda minister di Hulanda a ricibi e mensahe cu Aruba kier sigui traha y crece hunto siendo un partner valido y igual den Reino. Minister Bussemaker a compronde e mensahe bon y a indica cu lo consulta cu su conseheronan y funcionarionan pa percura cu esaki tuma luga.