ORANJESTAD (MEP) -- Poco dia atras tabata tin yen comocion na nos Pais na momento cu e corant Hulandes De Telegraaf a publica e artikel “De bende rond Mike Eman.”
Un artikel cu porcierto a duna un compilacion chikito di tur e iregularidadnan di ministernan cu ta rondona Minister Eman. Pero e lista di escandalo ey falta mas hende. Falta por ehempel Minister De Meza cu tambe ta forma parti di e ‘bende rond Eman’ y cu mester wordo investiga.
Fix belasting pa su compania
Tur hende na Aruba sa cu Minister De Meza ta liga na e compania MEM cu a traha hopi tempo como contratista den Valero. Remarcabel ta na october 2009 e compania aki liga na e mesun Minister di Finanzas nobo lo tabata deal pa no paga Gobierno loonbelasting manera mester ta. Acaso no ta e propio Minister di Finanzas lo a fix su mes compania un descuento di belasting???
Fix Valero
E no mester ta un secreto cu De Meza tabata tin bon relacion cu e refineria. Esey tabata bisto tambe na momento cu De Meza a bira Minister, un di su promer firmanan a bay bou di e Settlement Agreement cu Valero den cual a brinda e refineria un cantidad di beneficio. Entre nan beneficio fiscal pa 20 aña no paga belasting y un saco cu 76 miyon florin di placa di Pueblo. Acaso e bon relacion aki tabata e motibo pa cual e propio Minister di Finanzas a duna Valero beneficio???
Fix trabou transshipment
Den e Settlement Agreement firma pa Minister De Meza, a deal pa Valero keda nos Pais haciendo negoshi di transshipment. Y por arte de magia, ata e mesun compania MEM liga na e propio Minister De Meza parce ta traha como contratista eynan. Acaso esaki no ta fixmento di trabou pa e mesun Minister di Finanzas saca beneficio personal???
Fix deal pa desmantelacion
Den e mesun Settlement Agreement firma pa Minister De Meza a deal tambe cu si den un periodo di 3 aña no haya cumprado, Valero lo bay over pa desmantela e refineria. Ta bisto cu di e ora ey caba a parti e bolo di ken lo bay desmantela y ken lo haya e tereno pa desaroya. Remarcabel ta cu net e compania liga na Minister De Meza parce awor ta pidi su hendenan pa haci test di seguridad pa asina subi e tereno di Valero pa traha. Acaso ta pasobra cu Minister De Meza a fix cu ta e compania liga na dje mester haya contracto miyonario pa desmantela e refineria???
Suficiente motibo pa investiga
E lista chikito aki di fixmento di belasting, fixmento di Valero, fixmento di trabou transshipment y fixmento di deal pa desmantelacion ta duna suficiente motibo caba pa Minister Bermudez laga FIOD di Hulanda controla si tur cos a bay kosher cu pagamento di belasting door di e compania liga na Minister de Meza y e dealnan sera cu Valero tempo cu De Meza tabata Minister di Finanzas di nos Pais. Pasobra ta bisto caba cu e ‘bende rond Eman’ ta 'deugd voor geen meter' y cu den e caso aki Minister De Meza tambe MESTER wordo investiga.