WILLEMSTAD -- Ministerio di Salubridat, Medio Ambiente i Naturalesa a tuma nota di e komunikado a keda emití awe dor di CARPHA na Trinidad den kual nan ta informá ku a konstatá 5 kaso di Zika den nos region.
Den e trayekto di informashon pa loke ta trata prevenshon na komunidat di Kòrsou ministerio di GMN ta duna mas informashon tokante e malesa, su síntomanan i ta pone enfasis riba e parti mas importante ku kada suidadano mester evitá di keda pika dor di sangura i alabes eliminá tur foko kaminda e sangura por brui.
Kiko ta e malesa Zika?
Zika ta un infekshon kousá dor di e vírùs Zika. E vírùs di Zika ta plama via piká di e sangura Aedes aegypti. Pues, e mesun sangura ku ta transmití e.o. Dengue i Chikungunya ta transmití Zika tambe. Ademas di haña e infekshon via sangura, sientífikonan a determiná ku por haña Zika tambe via di sèks.
Kon bo ta protehá bo mes di Zika?
Komo ku ta via di piká di sangura por haña Zika, e manera general pa prevení Zika ta di evitá di kria sangura i no laga sangura pikabo. Una bes tin hende malu ku e malesa di Zika den kas, ta importante pa NO laga sangura pika ni esun malu ni tampoko esun ku ainda no a bira malu. Ora un sangura pika un hende malu e sangura ta keda infektá ku e vírùs. E sangura infektá ei ta sigui plama e malesa di Zika pa mas hende den kas i besindario.
Síntomanan di Zika
Despues di 3 pa 12 dia ku e vírùs ta den bo kurpa bo por haña un òf mas di e siguiente:
- keintura;
- iritashon di kueru (rash/uitslag);
- wowítis òf wowo hopi kòrá;
- doló di kabes, di kurpa i di skarnirnan;
- kurpa debil;
- pia hinchá.
Síntomanan ménos frekuente ta doló patras di wowo (manera Dengue), pèrdida di apetit, sakamentu, diarea i doló di barika. E síntomanan por dura entre 2 i 7 dia. Konforme informashon aktual Zika no ta un infekshon fatal, i Zika ta duna síntoma ménos fuerte ku Dengue i Chikungunya. No tin tratamentu pa Zika, ni vakuna pa prevení Zika.
Si bo sinti síntomanan paresido na esnan menshoná, akudí serka bo dòkter di kas. Dòkter por duna remedi pa aliviá e síntomanan manera keintura i dolónan.
Prevenshon
Ta importante pa prinsipalmente den e dianan aki di yobida bo inspekshoná den i rondó di bo kas i kita òf eliminá tur artefakto ku ta fangu awa. Sangura mester di awa pa e por pone su webunan pa nan brui. Kosnan ku por fangu i tene awa ta e.o.: tayer bieu, bòm di bòter kibrá pegá riba muraya, tobo pa laba paña i tambe wasmashin bieu, vas i skòter, ko’i hunga den kurá, barí i drùms sin tapa, het di dak, èmber bieu i artefaktonan ku por fangu awa, planchi di bromelia òf otro matanan den awa, kònchi òf baki di kuminda di bestia, pòchi di mata i hèrmènt pa traha, palu hòl i pal’i bambu kaminda awa por para. Rembak i tambe berpùt mester ta bon tapá pa sangura no drenta.
Sin artefaktonan ku ta wanta awa NO tin sangura. Sangura ta PELIGROSO! Pa mas informashon por like nos riba facebook GMN TV.
