ORANJESTAD -- Animal Balance, un organisacion di boluntario di Merca, ta mandando un ekipo di 20 profesional pa Aruba pa haci sterilisacionnan riba cacho di caya, garando y sterilisando e cachonan cu ta biba na e dump di Parkietenbos.
Tur cacho cu ta wordo gara lo wordo hiba bek pa e mesun luga unda nan a wordo haya, unabes cu nan wordo sterilisa.
Mientras cu e enfoke principal di “Operacion Cunucu,” ta pa gara e cachonan na e dump di Parkietenbos na un manera humano, bo por yuda bo bario tambe, door di trece algun di e cachonan cu ta biba riba bo caya, pa wordo opera.
Sitio di e Clinica: Centro Dakota
Bo por trece bo cachonan di caya: Entre 8am y 9am
Tempo di Buskeda despues di cirugia: 5pm
Fechanan: 26 di April, 27 di April, 28 di April, 29 di April y 30 di April.
Atencion Habitantenan di San Nicolas: Si bo ta desea di trece un cacho di caya, di bo caya, pa wordo opera y treci bek, e organisacion tin un punto di coleccion pafo di YMCA, pa esnan cu no tin transportacion. Boluntarionan lo busca e cacho di bon a e punto di coleccion aki y regresa e cacho pa bo, e mesun dia, entre 5pm y 6pm.
Atencion Habitantenan di Oranjestad: Si bo ta ta desea di trece un cacho di caya, di bo caya, pa wordo opera y treci bek, entrega nan na Centro Dakota; por fabor sigura cu e cacho ta riba un cabuya of den un kennel.
E Clinica di Sterilisacion Gratis pa cacho y puppy di caya lo trata un maximo di 500 cacho y puppy pa e campanja di e anja aki. Tur cacho sterilisa lo ricibi Vacunanan Gratis contra Parvo y Distemper, y tratamento di prevencion di purga y carpata. Tur cacho lo ricibi un tattoo chikito den nan orea pa indica cu nan a wordo opera.
Plataforma Ley de Cacho ta den sosten completo di e campanja aki, y nos ta pidi cu si bo ta un donjo di cacho, por fabor tene bo cacho riba bo propiedad, ya cu si nan gara bo cacho, e lo wordo sterilisa.
Adicionalmente, 40 boluntario local y internacional ta dunando di nan tempo pa sostene Operacion Cunucu,” den hopi otro manera pa sigura cu e campanja ta exitoso, y nos ta gradici nan.
“Operacion Cunucu” tin e sosten completo y cooperacion di e Gobierno di Aruba y miembronan di Parlamento, specificamente e Minister di Husticia, e Minister di Infrastructura y e Minister di Salud. Un reconocemento special mester bai na Miembro di Parlamento Donny Rasmijn.
E proyecto ta den desaroyo ya pa dos anja, y a wordo haci posible solamente door di e donacionnan sumamente generoso, di cual mayoria a bin di turistanan Mericano.
E proyecto ta disfruta di e sosten di e NGOnan local, gruponan di Derecho di Bestia, e veterinarionan local y hopi negoshi local, cualnan a sponsor e acomodacionnan, lunchnan, cuminda di cacho y hopi mas.
Ta nos deseo sincero cu Aruba lo bini hunto y yuda nos yega nos meta di un suma di 500 cacho sterilisa, nos mester di mas tanto sosten cu ta posible pa por haci esaki bira un realidad…asina ta, si bo sa di un cacho di caya, por fabor trec’e pa e por wordo sterilisa.
Sterilisacion ta beneficioso pa e bon salud di e cacho, y e ta e unico metodo humano di control di populacion. Sea un donjo di cacho responsable, no solamente un amante di cacho.
News Category:
Language:
