WILLEMSTAD -- Siman pasá Tera Kòrá tabata tin bishita di Luna Yen.
Djasabra dia 5 di sèptèmber último e hóbennan a hasi oudishon pa klasifiká pa e Semi final. E proyekto ‘Luna Yen’ ta un kompetensia na unda ku hóbennan por demonstrá nan talento den diferente disipliná artístiko. Huntu ku esei lo tin ‘Teatro te den bo bario’ un di dos proyekto kaminda mucha i hóben lo risibí tayer durante un siman largu pa na final di e siman nan presentá loke nan a traha durante e siman. Tur enkuentro ta tuma lugá entre 2’or i 5’or di atardi na Sentro di Bario Tera Kòrá.
Banco di Caribe ta kompartí e meta di un show di talento manera Luna Yen. Pa 8 aña konsekutivo a bin ta sostené e proyektonan. E ta pas perfektamente den e liña di maneho pa patrosinio; brinda e hóben oportunidat di desaroyá den forma positivo bou di guia profeshonal i semper perseverá pa alkansá ekselensia. Durante di e siman aki, ta dunando informashon na diferente skol. Banco di Caribe ta enkurashá tur mayor pa nan tambe motivá nan yunan pa inskribí na e diferente tayernan ku lo tin den barionan di Kòrsou. E próksimo lo ta den bario di Brievengat for di dia 14 pa dia 20 di sèptèmber.
Pa e siman na Brievengat por inskribí te ku dia djabièrnè 11 di sèptèmber próksimo.
Tokante Proyekto:
E proyekto aki ta dividí den 3 kategoria; e promé ta enserá tayer só. Pues tur hóben ku inskribí ta risibí diferente tayer entre otro Baile, Kanto/Músika i Aktuashon. Muchanan for di 6 aña bai ariba por partisipá. E di dos ta enserá tayer i oudishon. E hóbennan ku inskribí lo haña tayer den e disiplina ku nan skohe. Na final nan lo duna un presentashon ku alabes lo bira nan oudishon. Esun ku klasifiká lo bai e Semi Final di Luna Yen.
Pa hóbennan for di 14 aña te ku 22 aña. E terser, ta oudishon só. E hóbennan ku inskribí pa esaki no ta sigui e diferente tayernan, pero nan mester tei presente durante di e ensayo general i e oudishon. Esaki tambe ta pa hóbennan for di 14 aña te ku 22 aña. For di kada bario ta saka e finalista nan ku lo bai e Semi Final. Den e Semi Final lo saka e mihónan ku lo bai e Gran Final. Pa mas informashon tokante skema di bario, tayernan i oudishonnan bishitá e página wèp: www.lunablou.comòf e facebook page di Teatro Luna Blou. Tambe por yama Teatro Luna Blou na 462-2209.
News Category:
Language:
