ORANJESTAD -- Tur cos ta cla pa e prome Fiesta den Caya den cuadro di celebracion diDia di Mucha.
Esaki lo tuma luga diasabra na Madiki Kavel.
Gobierno di Aruba por medio di Servicio pa Comunidad y Bario, cu ta cay bou di Ministerio di Asuntonan General, ta invita tur mucha y hobennan pa bin celebra hunto Dia di Derecho di Mucha. E fecha di e celebracion mundial aki ta 20 di November, pero e evento “Fiesta den Caya” ta tuma luga dia 19 di November y ta priminti di bira algo grandioso.
E proyecto piloto aki ta tuma luga den bario di Madiki Kavel y ta wordo organisa hunto cu e comision di e bario, cu ta trahando na bienestar di e habitantenan, manera ta deseo di Prome Minister Mike Eman y su Gabinete.
E prome Straatfeest/Fiesta den Caya den Bario di Madiki Kavel ta dia 19 November, for di 9:00 am te 12:00 pm. En conexion cu Dia Internacional di Derechonan di Mucha, e Straatfeest/Fiesta den Caya, lo pone enfasis riba nos muchanan. E traatfeest ta un Projecto Piloto y ta e intencion pa continua cu esaki den otro barionan. Meta di e proyecto ta pa crea mas union y cooperacion entre habitantenan por medio di eventonan sano y proyectonan positivo cual lo contribui na bienestar general di e comunidad.
Den e prome Fiesta den Caya, cu ta tuma luga na e mini cancha deportivo di Madiki Kavel lo tin torneo di futbol entre mucha y hobennan den bariio, pa e mas chikitonan lo tin Dino Jump, pero tambe weganan popular riba caya, unda no ta bay tin circulacion di trafico. Tambe lo ta presente Payaso Alegre cu lo entretene chikito y grandi. E musica ta den man di un DJ.
Mucha y hobennan, specialmente di e bario, ta wordo invita pa bin participa den e evento cu ta wordo organisa specialmente pa nan.
E proyecto aki ta un acuerdo di cooperacion entre BOBARIO, Comishon Habitante Madiki Kavel, FCCA, Ministerio pa Asuntonan General y Ministerio di Infrastructura, bou organisacion di oficina Servicio pa Comunidad y Bario (SCB), cu ta resorta bou di Ministerio pa Asuntonan General y Bureau Minister President.