ORANJESTAD -- Ya pa di 8 aña consecutivo e scol den e deporte di arte marcial Tiger Taekwondo Academy ta organisa su torneo anual, Taekwondo Open Championship Torneo de Colores Banco di Caribe.
Den e campeonato di e aña aki un total di 9 scol di Aruba lo participa mientras cu for di exterior lo bin atletanan procedente di Venezuela y Republica Dominicana. Mester bisa cu e torneo de Colores ta un di e eventonan di taekwondo mas grandi di Aruba caminda e cantidad di atleta participante ta lo maximo, pues cu hopi combate. E fecha lo ta 27 di november proximo mientras cu Compleho Deportivo Frans Figaroa lo ta e cas di e torneo aki. E inicio di e torneo lo ta 9or di mainta unda nos atletanan local lo midi forsa contra esunnan internacional.
E popularidad di e deporte di taekwondo na Aruba ta grandi, tin varios scol di taekwondo riba nos isla, y nos atletanan elite ya a bira conoci mundialmente y ta presta den bon forma den tur e torneonan internacional bishita. Recientemente e taekwondista Monica Pimentel a marca historia door di bira e prome atleta local cu a clasifica pa e Weganan Olimpico, den e caso aki esun di Rio de Janeiro, Brasil. Tambe mester bisa acerca, cu e atleta John Jairo Maduro por poco a haci historia pa Aruba door di a haya e oportunidad di bringa dos biaha pa un medaya Panamericano, esaki na Toronto, Canada. Asina mes nos tin algun prospecto cu ta prestando den bon forma y dentro di algun aña henter mundo lo sera conoci cu nan.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e torneo anual Taekwondo Open Championship Torneo de Colores.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.