ORANJESTAD (MEP) -- Ser lider di partido MEP ta un di retonan mas grandi pa tur politico, mirando e democracia participativo di su miembronan.
MEP ta un partido hopi critico, caminda su miembronan constantemente ta ventila nan opinion pa bienestar di partido. E exigencianan di nos hendenan y nan expectativa ta hopi grandi, mirando e trayectoria di e partido pa mas di 44 aña caba.
Sin duda cu MEP ta e partido di haci cosnan grandi y historico. Nos promer lider legendario, un estadista awe den feliz memoria, Betico Croes a percura pa e simbolonan di e berdadero libertad ser poni den efectividad cu e culminacion di e logro grandi di nos Status Aparte y e reconocemento di e derecho di auto-determinacion, esta e libertad final na momento cu pueblo ta desea esaki. Durante 14 aña largo Betico a sirbi Aruba y nos prestigioso partido. Nos ta agradecido na nos Creador pa nos por tabata tin un lider asina grandi. Sinembargo bao di circumstancianan inespera y fastioso mi a tuma MEP over y a sirbi nos partido pa casi 25 aña como lider. Despues di 2009 cu mi a dicidi di retira, nos a pasa den un proceso pa un lider nobo.
Awe nos por bisa cu sra. Evelyn Wever-Croes a cumpli cu nos partido y e expectativanan. Sra. Wever-Croes ta un señora cu un integridad halto, balente, inteligente y organisatoriamente e ta haciendo un tremendo trabao. Nos di MEP mester a custumbra cu despues di 40 aña cu ta dos hende homber a guia MEP, un hende muher a tuma e timon over. No ta facil pa dirigi MEP, pasobra nos hendenan ta hopi critico y exigente den kico mester sosode.
Awor cu den un Congreso extra-ordinario nos lo bolbe re-eligi sra. Evelyn Wever-Croes como lider, ta nos obligacion moral cu partido pa nos cada un duna nos contribucion pa nos yega atrobe na carga responsabilidad gubernamental y cambia drasticamente rumbo di nos pais. Nos no por permiti e situacion di deterioro financiero continua. Aruba ta di nos tur y nos no por para na banda y laga otronan haci e trabao pa nos.
E periodo nobo cu ta bay cuminsa pa sra. Evelyn Wever-Croes ta grandi, pero posibel cu boso apoyo. E tempo di keda señala problema lo no soluciona nada, pero un periodo di exigi pa corigi e rumbo robes a inicia pa traha pa felicidad di nos pueblo. Partido no por ta un lider so, pero un team di hendenan cu mesun vision pa nan pais y cu metanan comun.
Nada cu ta pasa no por scapa nos mas. Nos mester para cla pa cualkier eventualidad. E tempo cu ken cu ta, ta bisa kico cu ta, anto tur cos ta bay con cu ta, mester bay pa pasado. Ningun hende ta cuminsa un lucha, un reto, si al final e no ta kere den exito, cu ta un victoria electoral. Laga nos sostene nos lider Evelyn, pasobra e silencio y keda keto di tur locual bo sa, no por ta un opcion mas pa nos. No lubida, cu pa Gabinete Eman e berdad no ta un defensa mas, pasobra nan semper ta manipula pa bruha pueblo. Como lider bo bay bo so, lo bo ta perde, pero si bo actua acompaña den un team di homber y muhernan balente y solido, e exito tey, ey mes pa nos.
Pabien partido MEP cu boso lider, sra. Evelyn Wever-Croes cu tin e oportunidad unico hunto cu nos tur pa pone partido MEP, na e caminda cu nos tur ta desea.
Sra. Evelyn Wever-Croes, hopi forza, perseverancia, fe y boluntad pa haci cosnan bon. Exito cu e Congreso extra-ordinario y cu Dios bendiciona y protega nos pais. Biba partido MEP, Biba Evelyn y Biba Aruba.
News Category:
Language:
Tag:
