ORANJESTAD -- Como titular di Comunicacion, Energia y Medio Ambiente, Minister Ing. Mike de Meza ta naturalmente hopi involucra den loke ta e vision di Aruba pa 100% sostenibilidad na 2020.
Den cuadro di e Siman di Iniciativanan Green cu a continua diahuebs cu apertura di Green Aruba Conference, Minister Ing. de Meza a hiba palabra yamando participantenan local, di e region y mas leu, bon bini na e evento.
Den su palabranan, a repasa unda a cuminsa, con leu nos ta y unda nos kier yega; pero mes importante, a menciona con y hunto cu ken kier yega na e meta. E reflexion a bay riba esnan cu ta brinda nan sosten, e caminda di aprendizahe, e importancia di comparti nos experiencia y cu e alternativa di no haci nada, no ta, en realidad, un opcion.
“Awe nos ta inicia e di shete Conferencia Green. Un di e prioridadnan tabata pa bay dilanti cu e vision di mas sostenibilidad, no solamente pa Aruba, pero pa henter mundo. E no tabata facil, rapidamente nos realisa cu nos mester a haci esaki den un escala mas grandi,” Minister Ing. de Meza a bisa na e sala di Marriott Ballroom yen di representantenan di sector publico y priva scuchando.
E mandatario a splica cu e plan cu a delinea tabata uno di diferente angulo ya cu a tene cuenta cu maneho di suministro pa medio di companianan di utilidad y tecnologianan nobo; riba e patronchi di consumo conscientisando comunidad pa bira socionan activo, pero tambe riba e importancia di educacion cu programanan manera ‘Green’s Cool’ na enseñansa basico, secundario y avansa.
Naturalmente e guia, ehempel y cooperacion activo di lidernan mundial manera ex Vice President Al Gore, astronauta y activista Wubbo Ockels (dfm) y tambe nos propio Dr. Edward Cheung tabata instrumental pa dirigi e esfuerzonan di e manera mas productivo. Hustamente esaki a laga e mandatario recorda e frase hopi biaha menciona, pero keto bay valido cu “If you wanna go fast, go alone; but if you wann gofar, go together.”
Esaki ta exactamente e filosofia cu Aruba kier sigui hiba y pesey ta pensa cu si Aruba por a logra tur loke a logra te awo, otro luganan na mundo tambe por haci’e. Minister Ing. de Meza: “Nos a bin ta move for di loke ta convencional y ta wak hopi productividad. Nos ta wak e cambionan.” Un ehempel ta e consumo di fuel como pais. Shete aña pasa, Aruba tabata consumi 7 mil bari di fuel oil pa dia pa su produccion di electricidad; awendia, esaki a baha te na 3.600 bari, un rebaho di 50%.
Na esey mester añadi e parkenan solar, molina di biento, biogas y otro iniciativanan actualmente den desaroyo. Awo como responsabel pa e cartera di Turismo y Transporte, Minister de Meza ta reconoce e peso di transporte cu ta representa 50% di e consumo di energia na cualkier pais y lo enfoca pa haci esaki mas efectivo.
“Shete aña pasa esaki no tabata un topico di discusion; tabata djis papia di baha e costo di utilidad. Awe nos ta haciendo bon; nos tin hopi cos andando. Nos ta percurando tambe pa stabilidad, calidad halto y un manera confiabel pa suministra esaki na comunidad. Nos ta bay sigui den e direccion aki,” asina Minister Ing. de Meza a finalisa bisando y invitando esnan presente pa participa, ban siña y comparti hunto. Esaki ta e transformacion pa un Mezcla Sostenibel di Energia, cual ta e tema principal di Green Aruba 2016.