ORANJESTAD -- Diahuebs a start e di shete Green Conference Aruba den Marriott Hotel. Un iniciativa di Gabinete Mike Eman desde 2010 cu e vision pa na 2020 ta independiente di petroleo fosil.
Un reto grandi mirando cu 2020 ta tras di porta. Hopi a wordo haci caba, pero ainda tin hopi mas pa haci. Di esey tur hende ta consciente.
Presente den e sala tabata Gobernador Interino di Aruba Su Excelencia sra. Yvonne Lacle- Dirksz den su prome presentacion oficial. Tambe Presidente y miembronan di Parlamento, Ministernan, embahadornan, stakeholdernan y demas invitadonan. Den su discurso Eman a yama danki na tur esnan cu ta yuda pa haci e diferencia pa loke ta futuro di nos isla y di mundo." Eman a conta e audiencia cu ora su gobierno a pone e meta 2020 su dilanti, un di e prome cosnan cu nan a haci ta bay en busca di partnernan local y internacional. Esaki pasobra hopi conocimento cu por comparti ta basa riba e trabou cu hunto a haci y cada avance cu wordo logra riba e tereno aki pa por haci e transformacion posibel. "Pesey awe mi ta reconoce nan empeño y duna nan e elogio mereci. Cu Carbon War Room mi a firma un acuerdo hunto cu Sir Richard Branson na Rio 2020, Rocky Mountain Institute ta otro partner leal cu ta yudando Aruba den su desaroyo y progreso riba tereno di sostenibilidad. "
"Pa por a amplia nos conocimento riba un plataforma mas grandi cu solamente Caribe, nos a dicidi cu nos tabata kier tin nos propio instituto di investigacion. Nos a bay Hulanda y a logra di atrae un di e institutonan mas grandi riba tereno di investigacion y estudio eynan, awe nos partner di cinco aña caba di cual nos ta masha orguyoso cu ta TNO. Tempo cu Jan Ebbing, e director di TNO a bin Aruba, e tabata e unico staff member di e instituto. Awe tin casi 20 profesional trahando cu Ebbing den TNO y mayoria di nan ta ingenieronan Arubiano. Nan a bin aki pasobra nos a crea oportunidad di trabou pa nan." Eman a gradici TNO pa a yuda crea e di tres pilar economico; esun di exportacion di conocimento. El a sigui bisa cu nunca e transformacion pa energia renobabel por ta posibel si bo no tin bo companianan di utilidad na bo banda. "Bo por tin hopi idea, pero e trabou mester wordo haci den e base. Nos ta hopi orguyoso awe di por bisa cu pa medio di hopi discusion y dialogo, WEB NV y ELMAR NV ta trahando cu nos riba e caminda di 2020." Un otro compania cu Eman a gradici ta Utilities, e compania madre di WEB y ELMAR.
"Pa por logra e plan ambicioso nos dilanti bo mester tin coordinacion riba tur tereno. Mi no por ta mas cu satisfecho di por tin un minister di Energia cu ta tambe un ingeniero cu ta compronde delaster un parti di e transformacion aki. Esaki ta nos colega Minister Mike de Meza. " Eman a splica cu e hunto cu su colega sa tin discusionnan regular riba tereno di petroleo, manera con e reapertura di un refineria ta cuadra cu e pensamento 'berde'. "Nos a haya otro haciendo uzo di tecnologia moderno y asina por tin un refineria cu ta 'environmental friendly'. E refineria di Aruba lo ta probablemente e prome den mundo cu ta bay recoge parti di e emision di CO2 y usa esaki pa un cultivo di algen. Esaki ta danki tambe na colega de Meza cu a hiba e discusionnan aki cu Citgo y a logra cu esaki ta bay tuma lugar.""
Na final di su discurso Eman a bisa di ta orguyoso di e Arubiano cu ta logra cosnan grandi rond mundo. "Nos por logra 2020 pasobra nos tin e hendenan rond di nos cu tin bon curazon y e pensamento corecto pa por haci e transformacion posibel. Nos ta haciendo progreso y lo comoparti esaki cu boso durante e dianan aki, mescos tambe discuti e retonan cu no tin ainda nos dilanti."